काठमाण्डौं । मेगा बैंक र टुरिजम डेभलपमेण्ट बैंकले राष्ट्र बैंकले तोकेको पूँजी पुर्याउनका लागि एकआपसमा मर्जमा जाने निर्णय गरेका छन् । दुई बैंक बीच हिजो बिहीबार औपचारिक रुपमा मर्जर सम्झौतामा हस्ताक्षर भएको हो ।
बैंकहरुले मर्जर सम्झौतासँगै सेयर आदान प्रदान अनुपात अर्थात स्वाप रेशियो पनि टुङ्ग्याएका छन् । मेगा र टुरिजमका बिचमा सेयर स्वाप रेशियो १०० बराबर ९५ हुने गरी मर्जर सम्झौता भएको हो । बैंक स्रोतले मेगाको एक सय बराबर टुरिजमको ९५ प्रतिशत सेयर आदान प्रदानको सहमति भएको भन्दै सेयर कारोबार रोक्का गर्नका लागि नेप्सेलाई पत्राचार गरिएको पनि जानकारी दिएका छन् ।
पश्चिामाञ्चल फाइनान्सलाई आफुमा गाभेर २५ प्रतिशत हकप्रद तथा १३ दशमलव २५ प्रतिशत बोनस बितरण गरेको मेगाले फेरि ६५ प्रतिशत हकप्रद निष्काशनको प्रस्ताव गरेको थियो । उता मातृभूमि विकास बैंक तथा कालिञ्चोक डेभलपमेण्ट बैंकलाई एक्वायर गरेको टुरिजमले मर्जर पछि १८ दशमलव छ प्रतिशत बोनस पछि शतप्रतिशत हकप्रद जारी गरेर मात्र मर्जरको प्रक्रियालाई अघि बढाउने छ ।
७ माघ २०७३, ११।००
वि.सं.२०७३ माघ ७ शुक्रवार ११:५६ मा प्रकाशित