महोत्तरी । महोत्तरीको सीतापुर भङ्गहाका किसानले आफ्नै सक्रियतामा व्यावसायिक रुपमा बीउ बैंक स्थापना गरेका छन् । बजारबाट महँगो मूल्यमा खरिद गरेर ल्याएको बीउबिजनबाट ठगिएपछि उत्पादन बढाउन उनीहरुले आफै बीउ बैंक स्थापना गरेका हुन् ।
नक्कली बीउकै कारण उत्पादन घटेर पिरोलिएका किसान गढीमाई कृषि सहकारीमार्फत रैथाने जातको बीउ जोगाउनमा लागेका छन् । जिल्ला कृषि विकास कार्यालयले किसनालाई ५० प्रतिशत अनुदानमा आधुनिक जातको मूल बीउ उपलब्ध गराएको जढीमाई सहकारीका अध्यक्ष सत्यनारायण यादवले बताए । यसअघि यहाँका किसान भारतीय बजारको बीउमा निर्भर थिए ।
“बजारको बीउमा धेरैपटक ठगियौँ, लगानी नै डुब्यो स्थानीय विजयकुमार महतोले भने, बीउ भण्डारण केन्द्र स्थापना भएपछि किसानलाई बीउ खरिद गर्न सजिलो भएको छ । उत्पादनका लागि बीउ भण्डारण कक्ष, पावर टेलर, बीउ ग्रेडिङ गर्ने मेसिन, सिड ड्रिललगायतका करिब रु १० लाख बराबरको उपकरण सहकारीमार्फत किसानलाई उपलब्ध गराएको वरिष्ठ कृषि विकास अधिकृत सुकेश्वर झाले बताए ।
प्रकाशित मितिः २०७३ माघ ८
वि.सं.२०७३ माघ ८ शनिवार १६:२९ मा प्रकाशित
