काठमाण्डौ । सरकार २५ वर्षपछि लगानी सम्मेलनको तयारीमा जुटेको छ । लगानी सम्मेलन मार्फत एक खर्ब विदेशी लगानी भित्र्याउने सरकारको लक्ष्य छ । उद्योग मन्त्रालय र लगानी बोर्डले संयुक्त रूपमा फागुन १९ र २० गते काठमाडौंमा लगानी सम्मेलन गर्न लागेका हुन् ।
यसअघि सरकारी तहबाट सन् १९९२ मा लगानी सम्मेलन भएको थियो । लगानी सम्मेलन नजिकै आइपुग्दा उद्योग मन्त्रालय र लगानी बोर्ड तयारीमा व्यस्त देखिएका छन् । सम्मेलनमा १० वटा मुलुकका सरकारी अधिकारी र निजी लगानीकर्ता सहभागी हुनेछन् । नेपाली तथा विदेशी गरी तीन सय जनाको सहभागिता रहने उद्योग मन्त्रालयका उपसचिव विमल बरालले बताए । सम्मेलन लगानी सम्भाव्यता भएका नौवटा क्षेत्रमा केन्द्रित हुनेछ ।
सम्मेलनका लागि लगानी बोर्डले परियोजना बैंक बनाइरहेको छ । तीन प्रकारका परियोजनामा लगानीकर्तामाझ प्रस्तुत गरिने भएको छ । सम्मेलनको आकर्षण विस्तृत सम्भाव्यता अध्ययन भएका परियोजना हुनेछन् ।
तामाकोसी तेस्रो, निजगढ अन्तर्राष्ट्रिय विमानस्थल, रेलमार्गजस्ता ९/१० वटा ठूला परियोजना अगाडि सार्ने बोर्डको तयारी छ । प्रारम्भिक अध्ययन भइसकेका ३०/३५ वटा परियोजना प्रस्तुत गरिनेछ । यसमा राजमार्ग, उत्तर।दक्षिण कोरिडोर लगायत परियोजना हुनेछन् । सम्मेलनमा विभिन्न परियोजनामा नेपाली र विदेशी लगानीकर्ताबीच लगानीको सम्झौता गर्ने तयारीसमेत भइरहेको छ ।
१८ माघ २०७३, ११।००
वि.सं.२०७३ माघ १८ मंगलवार १२:४५ मा प्रकाशित
