काठमाण्डौं । नेपाल स्टक एक्सचेन्ज लिमिटेडको दोस्रो बजारमा आजदेखि अड लट सेयर कारोबार हुने भएको छ । लगानीकर्ताले एक कित्तादेखि जत्ति पनि सेयर किनबेच गर्न सक्ने भएका छन् । कारोबार थप सहज बनाउन नियमित कारोबार समयमा नै दश कित्ता भन्दा कमको धितोपत्र किनबेच हुन सक्ने व्यवस्था गरिएको नेप्सेले जनाएको छ ।
नेप्सेले नियमित कारोबार समयमा नै आज आइतबारदेखि लागू हुनेगरी यो व्यवस्था गरेको हो । अब आइतबारदेखी लगानीकर्ताले नियमित कारोबार समयमै अडलट कारोबार गर्न सक्ने भएका छन् ।
नेप्सेले नियमित समयमा हुने अडलट कारोबारले बजारको मूल्य सीमा तथा परिसूचकमा असर नगर्ने व्यवस्था समेत मिलाएको छ । साना कित्ता कारोबारबाट सेयर किनबेचमा लाग्ने कमिशन भने बढी हुनसक्ने देखिन्छ ।
अभौतिकिकरण गरिएको सेयरको मात्र कारोबार हुने व्यवस्था लागु भएपछि १० कित्ताभन्दा पनि कम सेयर किनबेच गर्न सम्भव भएको हो ।
२३ माघ २०७३, ११।००
वि.सं.२०७३ माघ २३ आइतवार ११:०२ मा प्रकाशित
