काठमाडौ । नेपाली युवाको आकर्षक रोजगार गन्तव्य कोरियाले रोजगारीका लागि जान चाहने नेपाली कामदारका लागि चैतमा कोरियन भाषा परीक्षाको आवेदन खुला गर्ने भएको छ । जेठको अन्तिम साता परीक्षा सञ्चालन गर्ने योजनाअनुसार रोजगार अनुमति प्रणाली (ईपीएस) अन्तर्गतको भाषा परीक्षाको आवेदन चैत अन्तिम सातामा आह्वान गर्ने तयारी रहेको ईपीएस शाखाले जनाएको छ । परीक्षाका लागि आवेदन दिन अनलाइन प्रणालीको व्यवस्था गरिएको शाखाले जनाएको छ । संकलन केन्द्रमा लामो लाइन बस्नुपर्ने बाध्यतालाई अन्त्य गर्न अनलाइन प्रणालीको व्यवस्था गरिएको बताइएको छ ।
वैदेशिक रोजगार विभाग ईपीएस कोरिया शाखाले चैतमा परीक्षा आवेदन र जेठमा परीक्षा सञ्चालन गर्न कोरियाको मानव संसाधन बोर्ड (एचआरडी) लाई प्रस्ताव पठाएको छ ।
कोरिया सरकारले ईपीएसअन्तर्गत कामदार माग गरिरहेका १६ देशमा पनि यही समयमा परीक्षाको आवेदन र परीक्षा सञ्चालन गर्ने गरेको छ । यसअघि कोरियन भाषा परीक्षाको आवेदन पेस गर्न २४ घण्टाभन्दा बढी लाइन बस्नुपर्ने बाध्यता थियो ।
कोरियामा १६ देशका कामदारमध्ये नेपाली कामदारको कार्यक्षमता उच्च रहेका कारण मागसमेत बढ्दै गएको शाखाले जनाएको छ ।
प्रकाशित मितिः २०७३ माघ २५
वि.सं.२०७३ माघ २५ मंगलवार ०८:२९ मा प्रकाशित