काठमाडौ । पछिल्लो समयमा वित्तीय अपराध मौलाउँदै गएको पाइएको छ । वैदेशिक रोजगारी, बैंकिङ कसुर, जग्गा कारोबार, चेक बाउन्स तथा शैक्षिक परामर्श केन्द्रको आबरणमा बढी ठगी हुने गरेको छ । वित्तीय अपराध बढ्दै गएपछि प्रहरीले बैंक तथा बित्तीय संस्था र सहकारीमार्फत आर्थिक अपचलन, नेटवर्किङ तथा बिमा ठगी, विदेशी मुद्रा अपचलन, भिषा तथा क्रेडिट कार्ड ठगी, अवैध ढुकुटी सञ्चालन लगायत अपराध नियन्त्रणमा सक्रियता बढाएको छ ।
नेपाल प्रहरीले पछिल्लो डेढ वर्षको अवधिमा उपत्यकाका तीन जिल्लाबाट मात्रै पाँच अर्ब रुपैयाँभन्दा बढी ठगीमा संलग्न चार सयभन्दा बढी अभियुक्तलाई कारबाहीको दायरामा ल्याएको छ । उनीहरु घरजग्गा कारोबार, सहकारीको रकम हिनामिना, घरायसी लेनदेन, वैदेशिक रोजगारी, अंशवण्डा विवाद, शैक्षिक परामर्श केन्द्र लगायतको आवरणमा ठगी गरेको आरोपमा पक्राउ परेका हुन् । काठमाडौं प्रहरीमा पछिल्लो डेढ वर्षमा एक अर्ब भन्दा बढीको वित्तीय अपराधका उजुरी दर्ता भएको रेकर्ड छ । यो अवधिमा देशभरका सहकारीमा मात्रै झन्डै ११ अर्ब रुपैयाँ ठगी भएको सरकारद्धारा गठित छानविन आयोगको प्रतिवेदन छ ।
पछिल्लो छ वर्षको तथ्यांक हेर्ने हो भने आर्थिक वर्ष ०६७।६८ मा वित्तीय अपराधमा संलग्न ९२ जना पक्राउ परेका थिए । त्यस्तै, आर्थिक वर्ष ०६८।६९, ०६९।७०, ०७०।७१ र ०७१।७२ मा क्रमशः ५४, ७६, ४९ र ४६ जना अभियुक्त पक्राउ परेका थिए । गत आर्थिक वर्षमा भने वित्तीय अपराधमा संलग्न ७१ अभियुक्तलाई प्रहरीले पक्राउ गरेको थियो ।
प्रकाशित मितिः २०७३ माघ २५
वि.सं.२०७३ माघ २५ मंगलवार १५:०३ मा प्रकाशित
