काठमाण्डौं । कृषि विकास बैंकले हकप्रदमा नबिकेको झण्डै २० लाख कित्ता साधारण सेयर आजबाट लिलामीमा राखेको छ । बैंकले लिलामीमा राखेको सेयरमा माघ २७ गतेदेखि फागुन १२ गतेसम्म आवेदन गर्न सकिन्छ ।
बैंकले गत कात्तिक ३ गतेदेखि मंसिर ७ गतेसम्म एक करोड ९६ लाख ८८ हजार कित्ता हकप्रद सेयर बिक्रीका लागि आवेदन खुला गरेको थियो । जसमध्ये हकप्रदमा आवेदन नपरेको १९ लाख ६८ हजार पाँच सय ७५ कित्ता लीलामी गर्ने भएको हो ।
लीलामीको सेयर खरिद गर्न ईच्छुक लगानीकर्ताले बोलकबोल आवेदन फारम विक्री प्रबन्धक एस क्यापिटल मार्फत प्राप्त गर्न र बुझाउन सक्नेछन् । बोलकबोल न्युनतम एक सय कित्ता र बढिमा १० हजार कित्तासम्म गर्न सकिने छ ।
त्यस्तै लगानीकर्ताले न्युनतम एक सय रुपैँया र त्यसभन्दा बढि रकमको अंकित मुल्य गरि बोलकबोल आवेदन गर्न सक्नेछन् । लिलामीको नतिजा विक्री प्रबन्धक एस क्यापिटलले फागुन १३ गते खोल्ने जनाएको छ ।
२७ माघ २०७३, ११।००
वि.सं.२०७३ माघ २७ बिहीवार ११:०७ मा प्रकाशित
