काठमाडौ । ज्योति विकास बैंकले शतप्रतिशत अर्थात एक बराबर एकको अनुपातमा हकप्रद सेयर निष्काशन गर्न लागेको छ । बैंकले सेयर निष्काशन तथा विक्री प्रबन्धकमा सिद्धार्थ क्यापिटल लिमिटेडलाई नियुक्त गरेको छ । बैंक र सिद्धार्थ क्यापिटल बिच विहीबार सेयर निष्काशन गर्ने सम्बन्धी सम्झौता भएको हो । ज्योति विकास बैंक लि.का तर्फबाट प्रमुख कार्यकारी अधिकृत कृष्ण बहादुर कुँवर र सिद्धार्थ क्यापिटल लि. का तर्फबाट प्रमुख कार्यकारी अधिकृत धु्रव तिमिल्सिनाले उक्त सम्झौतामा हस्ताक्षर गरे ।
राष्ट्रिय स्तरको बिकास बैंक ज्योति विकास बैंकले गत आर्थिक वर्षको मुनाफाबाट बोनस सेयर वितरण गरेपछिको चुक्तापुँजीबाट एक बराबर एकको अनुपातमा हकप्रद सेयर निष्काशन गर्दैछ । बैंकको गत पुस २८ गते सम्पन्न नवौ वार्षिक साधारणसभाले उक्त निर्णय पारित गरिसकेको छ । बैंकले एक सय रुपैयाँ अंकित मूल्यमा एक अर्ब १० करोड ४३ लाख १७ हजार एक सय रुपैयाँ बराबरको एक करोड १० लाख ४३ हजार एक सय ७१ कित्ता हकप्रद सेयर निष्काशन गर्नेछ ।
गत आर्थिक वर्षको कमाईबाट बोनस सेयर वितरण गरेर ज्योतिले एक अर्ब १० करोड ४३ लाख रुपैयाँ पुर्याएको छ । हकप्रद सेयर जारी गरेपछि बैंकको चुक्तापुँजी दुई अर्ब २० करोड रुपैयाँ नाघ्नेछ ।
प्रकाशित मितिः २०७३ फागुन २०
वि.सं.२०७३ फागुन २० शुक्रवार १३:४० मा प्रकाशित