काठमाडौ। यातायात ब्यवस्था विभागको लाइसेन्स कार्यालय एकान्तकुनाले चैत १ गतेदेखि लिखित फारम नबुझ्ने भएको छ । लाइसेन्सका लागि अब अनिवार्य अनलाइन फारम नै भर्नुपर्ने ब्यवस्था गरिएको छ ।
त्यसअनुसार कार्यालय बाहिर बेचिने कागजी फारम बुझ्नै बन्द गर्न लागिएको कार्यालयका प्रमुख तेजनारायण यादवले जानकारी दिए । उनले फारम छापेर बिक्री गर्दै आएको ललिपुर उपमहानगरपालिकालाई अब फारम नछाप्न भनिसकिएको बताए ।
‘अब अनलाइन फारम भर्न नजान्नेहरु नागरिकता लिएर सिधै कार्यालयमा आउँदा हुन्छ । बाहिर फारम भर्न दलाल खोज्दै हिँड्नुपर्दैन’ कार्यालय प्रमुख यादवले भने ।
कार्यालयले चैत १ गतेदेखि कार्यालयकै कर्मचारीले लाइसेन्सका लागि अनलाइन फार भरिदिने ब्यस्था गर्न लागिएको जनाएको छ । फारम भरेबापत कार्यालयले कुनै शुल्क लिनेछैन ।
‘अब बाहिर दालालहरुसँग सेवाग्राहीले सम्पर्क नै गर्नुपर्दैन । सिधै फारम हामी नै भर्छौं । नागरिकता लिएर लाइन बस्नुभए हुन्छ’ उनले भने ।
अनलाइन फारम जहाँसकैबाट भर्न सकिने भएपनि धेरै सेवाग्राही कागजी फारम नै भर्न आउने गरेका छन् । यसको फाइदा उठाउँदै दाललहरुले फारको प्याड नै किनेर कृत्रिम अभाव गराउँदै एउटैको सय रुपैयाँसम्म बेच्ने गरेका छन् । त्यसलाई भरेर एउटा टिकट टाँसेबापत दलालहरुले एक हजार रुपैयाँसम्म लिने गरेका छन् ।
‘अब फारम नै बेच्न छाडिन्छ । अनलाइनमा भर्न नसक्नेलाई हामीले नै सुविधा दिनेछौं’ यादवले भने,’अब सेवाग्राहीको भेट त्यस्ता बिचौलियाँसग नहोस् भनेरै यो ब्यवस्था गरेका हौं ।’
अहिले काठमाडौंमा अनलाइनबाट लाइसेन्सको फारम भर्न सकिने ब्यवस्था छ । फारम भरेको भोलिपल्ट नागरिकतासहित कार्यालय गएर लिखित परीक्षाको प्रक्रिया सुरु गर्न सकिन्छ ।
प्रकाशित मितिः २०७३ फागुन २५
वि.सं.२०७३ फागुन २५ बुधवार ११:४७ मा प्रकाशित
