काठमाडौ । नेरुडे लघुवित्त विकास बैंकको ५० प्रतिशत हकप्रद, २० प्रतिशत बोनस र ११.०५ प्रतिशत नगद लाभांश पाउन सेयर सुरक्षित गर्ने बिहीबार अन्तिम दिन हो । नेरुडेले वार्षिक साधारण सभा र ५० प्रतिशत हकप्रद निष्कासन गर्न फागुन ३० देखि सेयरधनी दर्ता किताब बन्द गर्दैछ ।
शुक्रबार सेयर कारोबार नहुने अनि शनिबार र आइतबार सार्वजनिक बिदा परेकाले नरुडेको हकप्रद, बोनस र नगद लाभांशको हकदार हुन आजै सेयर किनिसक्नुपर्ने हुन्छ । किनकि नेरुडेले सोमबारदेखि बुक क्लोज गर्दैछ । हाल कायम सेयरधनी भने स्वतः लाभांशको भागिदार भइहाल्छन् । नेरुडेले चैत १४ गतेदेखि २ः१ अनुपातमा प्रतिकित्ता एक सय रुपैयाँ अंकित दरको नौ लाख कित्ता हकप्रद सेयर बिक्री खुला गर्ने भएको छ ।
हकप्रद सेयरमा बैशाख १७ गतेसम्म आवेदन दिन पाइने छ । यसैगरी, चैत ३१ गते नेरुडेले वार्षिक साधारण सभा बोलाएको छ । साधारण सभामा गत वर्षको नाफाबाट २० प्रतिशत बोनस सेयर र बोनस सेयरमा लाग्ने कर समेत गरेर ११.०५ प्रतिशत नगद लाभांश वितरण गर्ने प्रस्ताव लगिने भएको छ ।
प्रकाशित मितिः २०७३ फागुन २६
वि.सं.२०७३ फागुन २६ बिहीवार ११:०३ मा प्रकाशित
