काठमाण्डौं । राधी विद्युत कम्पनी लिमिटेडले आयोजना प्रभावित लमजुङबासीका लागि साधारण सेयर निष्कासनको अनुमति पाएको छ । धितोपत्र बोर्डले कम्पनीलाई आयोजना प्रभावितका लागि चार लाख १० हजार कित्ता सेयर निष्कासनको अनुमति दिएको हो ।
कम्पनीले एक सय रुपैयाँ अंकित दरका ४ करोड दश लाख रुपैयाँ बराबरको चार लाख दश हजार कित्ता सेयर आयोजना प्रभावित लमजुङबासीहरुलाई बिक्री गर्नेछ । त्यसपश्चात कम्पनीले सर्वसाधारणका लागि आइपीओ जारी गर्ने बताएको छ ।
कम्पनीले आयोजना प्रभावितलाई सहित कुल १० करोड २५ लाख रुपैयाँ बराबरको दश लाख २५ हजार कित्ता साधारण सेयर निष्काशन गर्नेछ । जसका लागि कम्पनीले नबिल इन्भेष्टमेन्ट बैकिंग लिमिटेडलाई धितोपत्र निष्काशन तथा बिक्री प्रबन्धकमा चयन गरेको छ ।
कम्पनीले घोर्मु गाविस ३ लमजुङमा राधी खोलाको पानी उपयोग गरी ४।४ मेगावाट क्षमताको राधी साना जलविद्युत आयोजना निमार्ण गरेको छ । साथै कम्पनीले २०७१ साल जेठ ३१ गतेबाट व्यापारिक उत्पादन समेत सुरु गरी राष्ट्रिय ग्रीडमा बिक्री समेत गरेको छ ।
४ चैत २०७३, ११।००
वि.सं.२०७३ चैत ४ शुक्रवार ११:०५ मा प्रकाशित