काठमाण्डौं । सरकारले पाठेघर मुखको क्यान्सर परीक्षण यसै आर्थिक वर्षबाट देशैभरि निःशुल्क गर्ने भएको छ । स्वास्थ्य मन्त्रालयले सबै जिल्लामा निःशुल्क परीक्षण सेवा सुरु गर्ने तयारी थालेको छ ।
कतिपय महिलाको मृत्युको कारण बनिरहेको पाठेघरको मुखमा हुने क्यान्सर न्यूनीकरणका लागि स्वास्थ्य मन्त्रालयले देशैभरि निःशुल्क परीक्षण सेवा विस्तार गर्न लागेको स्वास्थ्यमन्त्री गगनकुमार थापाले जानकारी दिए । थापाले महिलासम्बन्धी रोगहरूको उपचार सेवा र चेतना वृद्धिका कार्यक्रम तीव्र रूपमा विस्तार गरिने उल्लेख गरेका छन् । उनले तत्कालै प्रजनन स्वास्थ्य मेला देशभरका २० ठाउँमा सञ्चालन गर्ने पनि बताए ।
पाठेघरको मुखमा क्यान्सर हुनबाट रोक्ने एचपिभी भ्याक्सिन दिने कार्यक्रम अहिले चितवन र कास्कीमा सञ्चालन भइरहेको उनले जानकारी दिए । आगामी वर्षदेखि यस्ता कार्यक्रम क्रमशः सबै गाउँपालिका, नगरपालिका र स्थानीय स्वास्थ्य संस्थासम्म पुर्याउने मन्त्रालयको लक्ष्य रहेको मन्त्री थापाको भनाइ छ । ‘महिलाको पाठेघरको मुखमा हुन सक्ने क्यान्सरबाट जोगिन जति सजिलो छ क्यान्सर भईसकेपछि जीवन जोगाउन त्यति नै गाह्रो छ,’ मन्त्री थापाले भने । रोग लाग्नबाट बच्न समय–समयमा स्वास्थ्य परीक्षण गर्न पनि मन्त्री थापाले सबैलाई आग्रह गरेका छन् ।
१० चैत २०७३, नयाँपत्रिका, १०।००
वि.सं.२०७३ चैत १० बिहीवार १०:४० मा प्रकाशित