काठमाडौ। भारतका लागि नेपालका राजदूत दीपकुमार उपाध्यायले नेपाललाई थप विद्युत् उपलब्ध गराउन भारत सरकारसमक्ष आग्रह गरेका छन् । राजदूत उपाध्यायले भारतीय विदेश मामिला राज्यमन्त्री एमजे अकबरसँग भेटवार्ता गरी थप विद्युत् उपलब्ध गराउन आग्रह गरेका हुन् ।
नेपाल र भारतबीच अन्तरदेशीय प्रसारण लाइनका रुपमा रहेको कुशाहा– कटैया र रक्सौल–परवानीपुर प्रसारण लाइनको निर्माण सम्पन्न भएको छ । ती प्रसारण लाइनमार्फत थप ५०–५० मेगावाट विद्युत् आयातको तयारीमा नेपाल सरकार रहेको छ । भारत सरकारले आधिकारिक निर्णय नगर्दा विद्युत् आयात हुन सकेको छैन । राजदूत उपाध्यायले थप विद्युत् उपलब्ध गराउने विषयमा कुराकानी गरेका हुन् ।
राजदूत उपाध्यायले राज्यमन्त्री अकबरसँग भारत सरकारको सहयोगमा अगाडि बढिरहेको आयोजनाको शीघ्र कार्यान्वयनका विषयमा समेत कुराकानी गरेका थिए । विशेष गरी सडक पूर्वाधार निर्माणको कामलाई अगाडि बढाउने विषयमा छलफल केन्द्रित रहेको नयाँ दिल्लीस्थित नेपाली दूतावासले जारी गरेको विज्ञप्तिमा उल्लेख छ ।
यस्तै राजदूत उपाध्यायले नेपाली सामान निर्यात गर्दा लाग्दै आएको अतिरिक्त शुल्क, ड्यामरेज चार्ज(ठाउँ ओगटेबापतको शुल्क) तथा जुट र जुटजन्य सामग्रीमा लाग्दै आएको शुल्क हटाउन समेत राज्यमन्त्री अकबरसँग आग्रह गरेका थिए । नेपाली राजदूतको आग्रहमा राज्यमन्त्री अकबरले समस्या समाधानमा भारत सरकार सकारात्मक रहेको प्रतिक्रिया दिएका थिए । रासस
प्रकाशित मितिः २०७३ चैत १२
वि.सं.२०७३ चैत १२ शनिवार ११:४४ मा प्रकाशित
