काठमाण्डौं । इन्डियन आयल कर्पोरेन (आईओसी) ले कबोल गरेको गुणस्तर र परिमाणमा इन्धन आपूर्ति नगरे नेपालले मुद्दा हाल्न पाउने भएको छ । भारतको नयाँ दिल्लीमा सोमबार भएको नेपाल आयल निगम र आईओसीबीचको इन्धन आपूर्ति सम्झौता नवीकरणमार्फत यस्तो व्यवस्था गरिएको छ ।
आपूर्ति मन्त्री दीपक बोहोराले पाँच वर्षका लागि भएको इन्धन आपूर्ति सम्झौता नवीकरणमा नेपालले आईओसीबिरुद्ध सिंगापुरको अदालतमा मुद्दा हाल्न पाउने व्यवस्था गरिएको जानकारी दिए । उनले भने, ‘इन्धन आपूर्ति कारोबार सम्झौता विपरीत अबदेखि भारतले बिना कारण आफूखुसी नेपालाई इन्धन उपलब्ध गराउन आनाकानी गरे कानुनी उपचारका लागि नेपालले सिंगापुरस्थित अदालतमा मुद्दा हाल्न पाउने सम्झौता भएको छ ।’
हालसम्म यो व्यवस्था नभएका कारण भारतले ‘नाकाबन्दी’ र अन्य वहानामा नेपाललाई इन्धन उपलब्ध गराउन आनाकानी गर्दै आएको छ । यो व्यवस्थाका कारण नेपालले मुद्दा हालेको खण्डमा कानुनी रूपमा क्षतिपूर्ति पाउनेछ ।
१५ चैत २०७३, ९।३०
वि.सं.२०७३ चैत १५ मंगलवार ११:०१ मा प्रकाशित