काठमाडौ । नेपालमा औपचारिक रूपमै युरो–४ स्ट्यान्डर्ड डिजेल–पेट्रोलको बिक्री सुरु भएको छ । भारतले आफ्नो देशमा आजैबाट पूर्णरुपमा युरो–फोरको तेल बिक्री सुरु गर्दैछ । त्यसैकारण एक महिनाभन्दा अघिदेखि नेपालमा पनि अनौपचारिक रूपमा यूरो मापदण्डको तेल आउँदै थियो ।
यसअघि नेपालमा भारतबाट युरो–थ्री स्ट्याण्डर्डको तेल मात्रै आउने गरेको थियो । भारतले आफ्ना रिफाइनरीहरुबाट पूर्ण क्षमतामा युरो–फोर मापदण्डको तेल प्रोशोधन गर्न सुरू गरेकाले नेपालले पनि त्यसको लाभ पाउन लागेको हो ।
आलय निगमका प्रवक्ता सीतारम पोखरेलले आजबाट यूरो मापदण्डको तेत बिक्री सुरु भएको बताए । उनले यूरो मापदण्डको तेल बिक्री सुरु भएपनि मूल्य नबढ्ने स्पष्ट गरे ।
‘उपभोक्तालाई गुणस्तरीय तेल दिएपनि मूल्य बढ्दैन’,पोखरेलले भने, ‘अब यूरो फोर गुणस्तरको तेलले उपभाक्तालाई लाभ मिल्नेमा हामी विश्वस्त छौं ।’
भारतले सन् २०२० बाट युरो–सिक्स मापदण्डको तेल प्रशोधन गर्ने योजना बनाएको छ । अहिले देशभरका कच्चा तेलको प्रशोधन केन्द्रमा उसले युरो(फोर स्तरको तेल उत्पादन गर्न सुरू गरेको छ ।
सवारीको धुवाँलाई कम गर्न सहयोगी हुने युरो–फोर गुणस्तरको तेलले न्यून परिमाणमा प्रदूषण उत्सर्जन गर्छ । यो सवारीका कारण हुने प्रदुषण घटाउन पनि प्रभावकारी हुनेछ ।
युरो–फोर मापदण्डको इन्धनमा सल्फरको कम हुन्छ । जसका कारण सवारीसाधनको कार्य क्षमता पनि बढ्छ भने प्रदुषण पनि यसले कम गर्न मद्दत गर्छ ।
यसले तेलकै कारण सवारीको इञ्जिनमा पर्ने असर पनि हटाउँछ र इञ्जिनको आयु पनि बढाउन सहयोग गर्छ । महत्वपूर्ण कुरा, युरो फोर मापदण्डको तेलमा ५० पीपीएमको सल्फर हुन्छ । जुन अहिले प्रयोगमा रहेको पेट्रोलमा १५० र डिजेलमा ३५० पीपीएम हुन्छ । सल्फरको मात्रा कम हुनु नै यसको महत्वपूर्ण विशेषता हो ।
प्रकाशित मितिः २०७३ चैत १९
वि.सं.२०७३ चैत १९ शनिवार १५:१८ मा प्रकाशित
