A complete Economic News Portal From Nepal

काठमाण्डौं । गएको दुई दशकमा नेपालीहरुको उपभोग्य खर्च ११ गुणाभन्दा बढीले बढेको छ। केन्द्रीय तथ्यांक विभागका अनुसार आर्थिक वर्ष २०५२/५३ को तुलनामा ०७२/७३ मा सो परिणामले बढेको देखिएको छ। गएको आर्थिक वर्ष प्रतिव्यक्तिवार्षिक उपभोग खर्च ७० हजार ६ सय ८० रुपैयाँ रहेको छ। जुन आव ०५२/५३ मा ६ हजार ८ सय २ रुपैयाँ रहेको थियो।

व्यक्तिको क्रय शक्ती बढेको र मूल्य बृद्धि बढेकोले खर्चको रकम पनि बढ्दै गएको केन्द्रिय तथ्यांक विभागका महानिर्देशक सुमनराज अर्यालले जानकारी दिए।

विभागको घरपरिवार सर्वेक्षण अनुसार आव ७१÷७२ को समिक्षा वर्षमा कूल वार्षिक औषत घरपरिवार खर्च पनि ११ प्रतिशतले बढेको छ। ७१/७२ नेपालको औषत वार्षिक घरपरिवारको उपभोग खर्च १६ खर्ब २२ अर्ब रुपैयाँबाट बढेर १८ खर्ब २५ अर्ब पुगेको छ।

औषत पाँचजनाको परिवार रहेको नेपालमा ५४ लाखभन्दा बढी घरपरिवार रहेका विभागको आँकडा रहेको छ।

उपभोग खर्चको हिसाबले धनी र गरिब गाउँ र शहरबीचमा असमानता बढ्दै गएको पाइन्छ। तथ्यांकअनुसार त्यस्तो विभेद गाउँको तुलनामा शहरमा बढी रहेको विभागको तथ्यांक रहेको छ।

घरपरिवार सर्वेक्षण २०७२/७३ अनुसार गाउँका घरपरिवारको वार्षिक औसत उपभोग खर्च २ लाख ४८ हजार रुपैयाँ रहेको छ भने शहरी घरपरिवारको खर्च ४ लाख ३१हजार रुपैयाँ छ । यस हिसाबले गाउँमा नेपाली घरपरिवारको औषत वार्षिक खर्चभन्दा गाउँमा थोरै शहरमा धेरै रहेको छ । वार्षिक औसत उपभोग खच ३ लाख २२ हजार ७ सय ३० रुपैयाँ रहेको छ।

यसैबीच खर्चको प्रकार अनुसार सहर र गाउँबीचका प्राथमिकता फरक फरक देखिएका छन्। सर्वेक्षण अनुसार सहरमा गैरखाद्य खर्च बढी छ भने गाउँमा खाद्यजन्य खर्च धेरै रहेको छ।

शहरी घरपरिवारको खाद्य उपभोग खर्च ४४.९ प्रतिशत तथा गैर खाद्य उपभोग खर्च ५५.१ प्रतिशत छ भने ग्रामीण घरपरिवारको खाद्य उपभोग खर्च ५९.८ प्रतिशत तथा गैर खाद्यउपभोग खर्च ४०.२ प्रतिशत रहेको छ । समग्र नेपाली घरपरिवारको खाद्यउपभोग खर्च ५३.८० प्रतिशततथा गैर खाद्यउपभोग खर्च ४६.२ प्रतिशत रहेको छ ।

२५ चैत २०७३, सेतोपाटी, ७।००