जेसोन चम्किएपछि पाकिस्तानमाथि वेष्ट इन्डिजको उत्कृष्ट जित

जेसोन मोहम्मदको बिस्फोटक इनिङका कारण वेष्ट इन्डिजले पाकिस्तानविरुद्ध घरेलु एकदिवसीय शृंखलाअन्तर्गत शनिवार सम्पन्न पहिलो खेलमा ४ विकेटको विजय हात पारेको छ।

पहिलो पल्ट ३ सय ८ रनको विशाल लक्ष्यलाई पछ्याएको वेष्ट इन्डिजले ३२ ओभरमा १ सय ५६ रन बनाउदा ३ विकेट गुमाइसकेको थियो। यसपछि क्रिजमा प्रवेश गरेका जेसोनले ३ छक्का र ११ चौकाको सहयोगले ५८ बलमा अविजित ९१ रन बनाएपछि वेष्ट इन्डिज १ ओभरको खेल खेल्न बाँकी रहँदा विजयी भयो।

तीन खेलको शृंखलामा वेष्ट इन्डिज १–० ले अगाडि बढेको छ। वेष्ट इन्डिजको एकदिवसीयमा कुनै टोलीविरुद्ध सबैभन्दा ठूलो रन पछ्याएर विजय सम्भव पारेको यो पहिलो अवसर हो। यसअघि दक्षिण अफ्रिकाविरुद्ध वेष्ट इन्डिजले ३ सय रन पछ्याएर जितेको थियो।

वेष्ट इन्डिजलाई जितका लागि अन्तिम १३ ओभरमा १ सय २८ रनको आवश्यकता थियो। यसपछि बिस्फोटक देखिएका जेसोनले मोहम्मद आमिर, वाहब रियाज र हसन अलीजस्ता पाकिस्तानी तीब्र बलरलाई बाउन्ड्री हिर्काएका थिए।

वेष्ट इन्डिजको जितमा पुछारका बलर एस्ले नर्ससँग जेसोनको साझेदारी महत्वपूर्ण रहयो। यी दुवैले अन्तिम ४ ओभरमा ११ भन्दा माथिको औसतले अविजित ५० रनको साझेदारी गरेका थिए। नर्सले १ छक्का र ५ चौकाको सहयोगले १५ बलमा अविजित ३४ रन बनाए। नर्सले ४ विकेट पनि लिएका थिए।

यसअघि पहिलो ब्याटिङ गरेको पाकिस्तानले मोहम्मद हाफिजको ८८ रनको सहयोगले ५ विकेटको क्षतिमा ३ सय ८ रन बनाएको थियो। पाकिस्तानका लागि दुवै प्रारम्भिक ब्याट्सम्यान अहमद सहेजादले ६७ र कमरान अकमलले ४७ रन बनाएका छन्। मध्यक्रममा सोहेब मलिकले ३८ बलमा २ छक्का र ६ चौकाको सहयोगले ५३ रन बनाएका थिए। खेलको म्यान अफ दि म्याच जेसोनलाई घोषित गरियो।

प्रकाशित मितिः २०७३ चैत २६

२०७३ चैत्र २६ गते १४:१८ मा प्रकाशित

You can share this post!

विश्वविद्यालयको पढाइ पनि अब मर्ज हुँदै

एक सय वर्षका बृद्ध मतदानको पर्खाइमा

Related posts