अमेरिकाले कोरियाली प्रायद्विपमा नौसेना खटाएको छ । उत्तर कोरियाको मिसाइल कार्यक्रमका कारण खतरा बढ्दै गएको भन्दै अमेरिकी सेनाले आफ्नो नौसेनको एक समूहलाई कोलियाली प्रायद्विपको समुद्री क्षेत्रमा खटाएको हो ।
अमेरिकाले लडाकु पानी जहाज, लडाकु विमानसहितको कार्ल भिन्सन स्ट्राइक समूहलाई खटाएको हो । अमेरिकी नौसेनाको स्ट्राइक समूह अहिले प्रशान्त महासागरको पश्चिमी क्षेत्रमा रहेको अमेरिकी सेनाको प्यासिफिक कमाण्डका प्रवक्ता डाभे बेनहामले बताए ।
परमाणु हतियारको क्षमता बढाउने उद्देश्यले उत्तर कोरियाले गरिरहेको मिसाइल परीक्षणका कारण कोरियाली प्रायद्विपमा खतरा बढ्दै गएकाले नौसेना तैनाथ गरिएको बेनहामको भनाई छ । अमेरिकी राष्ट्रपति डोनाल्ड ट्रम्पले उत्तर कोरियाको परमाणु कार्यक्रमका कारण उत्पन्न खतराको सामना गर्न अमेरिका एक्लै तयार रहेको बताएको केही दिनमै नौसेना कोरियाली प्रायद्विपमा खटिएको हो ।
प्रकाशित मितिः २०७३ चैत २७
वि.सं.२०७३ चैत २७ आइतवार १७:४७ मा प्रकाशित