काठमाडौ । पदयात्रा गन्तव्यको महत्वपूर्ण क्षेत्र मानिने लाङटाङमा ट्रेकिङ एजेन्सिज एशोसिएशन अफ् नेपाल (टान)ले आगामी बैशाख १२ गते (अप्रिल २५ तारिख)का दिन दोस्रो टान अन्तर्राष्ट्रिय लाङटाङ म्याराथुनको आयोजना गर्ने भएको छ । दोस्रो टान अन्तर्राष्ट्रिय लाङटाङ म्याराथुनको सम्पूर्ण तयारी सकिएको आयोजक ट्रेकिङ एजेन्सिज् एशोसियसन अफ नेपाल(टान) ले जनाएको छ ।
७२ सालको भूकम्पले क्षति पुर्याएको लाङटाङ क्षेत्रमा पदमार्ग सुरक्षित छ भन्ने सन्देश विश्वभर फैलाउन साथै खेलकुद पर्यटनस्थलको विकास गर्न म्याराथुन आयोजना गरिएको र त्यसलाई निरन्तरता दिईएको टानले जनाएको छ ।
गएको वर्ष पहिलो संस्करणमा टानले हाफ म्याराथुन आयोजना गरेको थियो । त्यसबेला गोसाइकुण्डदेखि रसुवा सदरमुकामसम्म प्रथम टान गोसाइकुण्ड लाङटाङ म्याराथुन आयोजना भएको थियो ।
यसपाली भने लाङटाङ राष्ट्रिय निकुञ्चको क्यानजिङ गुम्बाबाट सुरु भई थाङस्याप घोडा तबेला हुँदै स्याफ्रुवेसीसम्म झण्डै ४२ किलोमिटर म्याराथुनको आयोजना गर्न लागेको टानले जनाएको छ ।
म्याराथुनमा सहभागिताका लागि आवेदन लिने प्रक्रिया चलिरहेको छ । म्याराथुनमा सहभागी हुन चाहने नेपाली धावकले १ हजार ७ सय र विदेशी धावकले ५५ सय रुपैयाँसहित नाम दर्ता गर्न सक्ने छन् । म्याराथुनका महिला र पुरुष दुवैतर्फका विजेताले एक लाख, दोस्रो हुनेले ७५ हजार र तेस्रो हुनेले ५० हजार रुपैयाँ पुरस्कार पाउने छन् । म्याराथुनमा एकसय जना सहभागी हुने टानले जनाएको छ ।
प्रकाशित मितिः २०७४ बैशाख ८
वि.सं.२०७४ वैशाख ८ शुक्रवार १३:४१ मा प्रकाशित