काठमाडौ । बुधबार सेयर बजार परिसुचक नेप्से २.०८ विन्दुले घटेर १६७०.३० अंकमा आएर अडिएको छ । सूचकसँगै कारोबार रकममा पनि ह्रास आएको छ । बुधबार ९५ करोड ५१ लाख रुपैयाँभन्दा धेरैको सेयर किनबेच भएको छ ।
बुधबार क वर्गका परिसुचकको मापन गर्ने सेन्सेटिभ इन्डेक्स पनि १.५६ अंकले घटेको छ । कुल १४५ कम्पनीको १४ लाख ९० हजार २४८ कित्ता सेयर खरिदबिक्री भएका हुन् । बुधबार वाणिज्य बैंक, होटेल र उत्पादनमूलक समूहको परिसुचक घटेका छन् । बाँकी सबै समूहका सूचक बढेका छन् । सबैभन्दा धेरै उत्पादनमूलक समूहको सूचक ३०.१ अंकले तल झरेको हो । वाणिज्य बैंक समूहको सूचक ७.९ अंकले घटेको छ । होटल्स समूहको परिसुचक १५. ८४ अंकले घटेको छ । यता, विकास बैंक समूहको सूचक सबैभन्दा धेरै १७.३१ विन्दुले बढेको छ ।
कारोबार रकममा नेपाल लाइफ इन्सुरेन्स कम्पनीले अग्रता कायम गरेको छ । नेपाल लाइफको ६ करोड ५४ लाख रूपैयाँभन्दा धेरैको सेयर कारोबार भएको हो । कारोबार रकमको आधारमा दोस्रो र तेस्रो स्थानमा क्रमशः राष्ट्रिय बिमा कम्पनी (संस्थापक) र ग्लोबल आइएमई बैंक परेका छन् ।
प्रकाशित मितिः २०७४ बैशाख १३
वि.सं.२०७४ वैशाख १३ बुधवार १५:३४ मा प्रकाशित
