अमेरिकी राष्ट्रपति डोनाल्ड ट्रम्पले उत्तर कोरियाको समस्या समाधानका लागि राम्रो काम गरेको भन्दै चिनियाँ राष्ट्रपति सी जिनपिङको प्रशंसा गरेका छन् । समाचार संस्था रोयटर्ससँगको विस्तृत अन्तर्वार्ताको क्रममा ट्रम्पले सी देशलाई माया गर्ने निकै असल व्यक्ति गरेको भन्दै प्रशंसा गरेका हुन् ।
चिनियाँ राष्ट्रपति सीले उत्तर कोरियाका कारण उत्पन्न समस्या कुटनीतिक रुपमा समाधान गर्न चारहेको ट्रम्पको भनाई छ । तर कुटनीतिक रुपमा उत्तर कोरियाको समस्या समाधान हुने सम्भावना कम रहेकाले संघर्षको सम्भावना नकार्न नसकिने ट्रम्पले बताएका छन् । ट्रम्पले राष्ट्रपतिमा निर्वाचित भएलगतै उत्तर कोरियाका कारण उत्पन्न भएको समस्या समाधानका लागि केही नगरेको भन्दै चिनियाँ राष्ट्रपति सीको आलोचना गरेका थिए ।
उत्तर कोरियाको समस्या समाधानका लागि अमेरिका एक्लै तयार रहेको पनि उनले बताएका थिए । तर अप्रिलको सुरुमा चिनियाँ राष्ट्रपति सीसँग भएको भेटवार्ता तथा त्यसपछि भएका टेलिफोन वार्तापछि ट्रम्पको भनाई परिवर्तन भएको हो ।
ओभल कार्यालयमा रोयटर्ससँग भएको अन्तर्वार्ताको क्रममा ट्रम्पले चिनियाँ राष्ट्रपति सीले द्वन्द्व र मानिसको क्षति नचाहेको बताए । अमेरिकाले उत्तर कोरियाको परमाणु कार्यक्रमलाई लिएर चिन्ता र चासो जनाउँदै आएको छ ।
यही विषयलाई लिएर उसले उत्तर कोरियामाथिको प्रतिबन्ध थप कडा बनाउने तयारी पनि गरेको छ । उत्तर कोरियाको बारेमा छलफल गर्न संयुक्त राष्ट्रसंघको सुरक्षा परिषदको बैठक शुक्रबार बस्दैछ ।
प्रकाशित मितिः २०७४ बैशाख १५
वि.सं.२०७४ वैशाख १५ शुक्रवार १३:३५ मा प्रकाशित
