काठमाडौ । अल्पाइन डेभलपमेन्ट बैंक लिमिटेडले निष्काशन गर्न लागेको हकप्रद सेयर यही जेठ २० गते सम्म कायम सेयरधनीले मात्रै भर्न पाउने भएका छन् । बैंकले हकप्रद प्रयोजनका लागि जेठ २१ गते सेयरधनी पुस्तिका बन्द गर्ने निर्णय गरेको हो ।
गत जेठ ७ गते अल्पाइनले तीन बराबर २.०८ को अनुपातमा हकप्रद सेयर जारी गर्न नेपाल धितोपत्र बोर्डबाट अनुमति पाएको थियो । अल्पाइनले एक सय रुपैयाँ अंकित मूल्यमा १८ करोड तीन लाख २४ हजार सात सय रुपैयाँ बराबरको १८ लाख तीन हजार दुई सय ४७ कित्ता हकप्रद सेयर जारी गर्नेछ । हाल अल्पाइनको चुक्तापुँजी २६ करोड ७५ हजार चार सय रुपैयाँ रहेको छ । हकप्रद जारी गरेपछि बैंकको चुक्तापुँजी ४४ करोड चार लाख रुपैयाँ पुग्नेछ ।
हकप्रद सेयर निष्काशन गर्नका लागि अल्पाइन डेभलपमेन्ट बैंकले सेयर निष्काशन तथा विक्री प्रबन्धकमा एनएमबि क्यापिटल लिमिटेडलाई नियुक्त गरेको छ ।
प्रकाशित मितिः २०७४ जेठ १२
वि.सं.२०७४ जेठ १२ शुक्रवार १५:०५ मा प्रकाशित
