काठमाडौ । जापानको प्रख्यात चेन रेस्टुरेन्ट उरुतोराले नेपालमा आफ्नो शाखा विस्तार गरेको छ । आफ्नो १४औं चेनका रुपमा उरुतोरा नेपाल आएको हो ।
उरुतोराले बालुवाटारको रसियाली राजदूतावास नजिकै झण्डै २ करोड रुपैयाँ लगानीमा सुविधासम्पन्न ‘उरुतोरा नेपाल’ रेस्टुरेन्ट खोलेको हो । जापानमा रेष्टुरेण्ट ब्यबसायमा स्थापित लोकनाथ वस्ती र प्रकाश पौडेलको पहलमा जापानी लगानीकर्ता समेतको सहभागीतामा यो रेष्टुरेण्ट खुलेको हो ।
यो रेस्टुरेन्टको १ महिना अघि जापानका पूर्वप्रधानमन्त्री युकेओ हातोयामा र नेपालका लागि जापानका राजदूत मासासी ओगावाले उद्घाटन समेत गरेका थिए । रेस्टुरेन्ट भीआईपी क्षेत्र मानिने बालुवाटारको शान्त वातावरणमा अवस्थित छ । रेस्टुरेन्टका सबै परिकारहरु पूर्ण रुपमा हाइजेनिक रहेको दावी सञ्चालहरुको छ । मेनुमा झण्डै २ सय प्रकारमा स्वादिष्ट परिकारहरु समावेश छन् ।
जापानिज सेफ मासे सादाओ आफैं परिकारलाई उत्कृष्ट रुपमा पस्कन उरुतोरामा कार्यरत छन् । उनीसँग जापनिज रेस्टुरेन्टहरुमा काम गरेका अनुभवी कुक र हेल्परहरु पनि छन् । जापानमा बढी रुचाइने सुसी, सासेमी, चिकेन तेरियाकी, टेम्पुरा, खाराआगे लगायतका परिकार यहाँका बिशिष्ट परिकार हुन् ।
ग्राहकलाई स्वादिष्ट परिकारसँग जापानको सेवाको महसुस गराउन सजावटमा पनि विशेष ध्यान दिइएको सञ्चालक पौडेलले बताए । पोखरा, लुम्बिनी र चितवनमा लगानीका लागि तयारी तिब्र पारिएको उनले बताए ।
प्रकाशित मितिः २०७४ जेठ १२
वि.सं.२०७४ जेठ १२ शुक्रवार १७:२१ मा प्रकाशित
