काठमाडौ। तपाई जेब्रा क्रसिङ, आकाशे पुल, सब–वेको प्रयोग नगरी जथाभावी बाटो काट्नुहुन्छ ? वा सडकको फुटपाथ छाडेर बीच सडकबाटै जथाभावी हिँड्नुहुन्छ ? आजबाट यो बानी त्यागिदिनुस्, नत्र तपाईंले ठाउँको ठाउँ ट्राफिक प्रहरीलाई २ सय रुपैयाँ जरिवाना तिर्नपर्नेछ । पैसा तिर्नु चाहनु भएन वा सक्नु भएन भने प्रहरीले कार्यालयमा ३ घण्टा नियन्त्रणमा राख्नेछ ।
मंगलबारबाट उपत्यकाभित्रका सडकमा जथाभावी बाटो काट्ने र पेटी छोडेर सडकमा हिँड्ने पैदल यात्रु २ सय रुपैयाँ तिर्नुपर्ने ब्यवस्था लागू भएको महानगरीय ट्राफिक प्रहरी महाशाखाले जनाएको छ । प्रहरीले आज विहानबाट सुरु गरेको यो अभियानमा सयौं यात्रु कारवाहीमा परिसकेका छन् । हरेक वर्ष उपत्यकामा हुने दुर्घटनामा मृत्यु हुने मध्ये ४० प्रतिशत पैदल यात्रुबाट नै हुने गरेको उल्लेख छ ।
यातायात व्यवस्था विभाग र महानगरीय ट्राफिक प्रहरी महाशाखाले आजदेखि यो व्यवस्था लागू गर्दै पैदल यात्रुलाई जेब्रा क्रसिङबाटै बाटो काट्नुपर्ने नियम लागू गरेको हो ।
यता जथाभावी बाटो काट्दा तिर्न रकम नहुनेलाई तीन घण्टा प्रहरी नियन्त्रणमा राखिनेछ । त्यसका नियन्त्रणमा राख्दा ट्राफिक नियमबारे सचेतना कक्षा लिइनेछ । प्रहरीले जेठ १ गतेदेखि यो ब्यवस्था लागू गर्ने भनेपनि स्थानीय तहको चुनावका कारण लागू गर्न सकेको थिएन ।
अर्काै बुझ्नुपर्ने कुरा के छ भने प्रहरीले जुन नियम लागु गरेको छ त्यो नियम सबैतिर त्यो समयसम्म लागु हुन सक्दैन जबसम्म सडकको पूर्वाधार र जेब्रा क्रसिङलाई व्यवस्थित पारिन्न ।फाईल फोटो गुगलबाट
प्रकाशित मितिः २०७४ जेठ १६
वि.सं.२०७४ जेठ १६ मंगलवार १४:०९ मा प्रकाशित
