डडेल्धुरा । पहाडी राजमार्गका सडकमा दुर्घटना न्यूनीकरण गर्न फलामे बार लगाइएको छ । बर्सेनि ७ नं प्रदेशका पहाडी सडकमा सडक दुर्घटनामा परी थुप्रै मानिसले ज्यान गुमाउने र धेरै मानिस अङ्गभङ्ग हुन थालेपछि उक्त बार लगाइएको हो ।
सुदूरपश्चिमको महाकाली राजमार्गअन्तर्गत कैलालीको खानीडाँडादेखि दार्चुलासम्म र जयपृथ्वी राजमार्गमा सडक सुरक्षाका लागि फलामे बार लगाउन सुरु गरिएको छ ।
सडक डिभिजन कार्यालयका अनुसार यातायातको चाप बढी हुने सुदूरपश्चिमका अधिकांश पहाडी राजमार्गमा सडक सुरक्षा सहयोग कार्यक्रमअन्तर्गत सडक दुर्घटना कम गर्न करोडौँको लगानीमा फलामको बार लगाएको हो ।
सडकको घुम्तीसहित जोखिम क्षेत्रमा फलामको बार लगाउँदा राति बारमा गरिएको पेन्टिङले घुम्तीमा रोडलाइन देखाउने र सामान्य रुपमा गाडीमा समस्या आई ब्रेकफोर्स समेत गरी दुर्घटनाबाट जोगाउने डिभिजन कार्यालय डोटीेका इ महानन्द जोशीको भनाइ छ ।
सडकमा फलामे बार लगाउँदा यात्रु गाडी दुर्घटनाको जोखिमबाट जोगिने र चालकलाई समेत दिउँसो र राति गाडी चलाउनमा सहजता भएको छ ।
डडेल्धुरा, डोटी, बैतडी, दार्चुला र बझाङका राजमार्गमा जोखिम र घुम्ती भएको स्थानमा फलामे बार लगाउने काम भइरहेको छ ।
विश्व बैंकको आर्थिक सहयोगमा सडक सुरक्षाका लागि फलामको बार लगाइएसँगै सडक दुर्घटनामा कमी आउने विश्वास लिइएको छ ।
(फाइल फोटो)
प्रकाशित मितिः २०७२ जेठ २३
वि.सं.२०७४ जेठ २३ मंगलवार १२:१४ मा प्रकाशित