काठमाडौ । मंगलबार संसद बैठकलाई मंगलबार सम्बोधन गर्दै प्रधानमन्त्री पुष्पकमल दाहाल प्रचण्डले भरतपुर घटना दुखःद भएको बताए । उनले भने, ‘भरतपुरमा जो घटना भयो दुःखद छ गलत छ । मैले च्यातियो भन्ने सुनेपछि नै गलत भयो भनेको छु र निर्वाचन आयोगलाई प्रधानमन्त्रीको हैसियतले बोलाएर जे ठीक लाग्छ त्यहि गर्नुस् भनेर भनेको छु । मतपत्र च्यात्नेलाई सही भन्न सकिँदैन ।’
मतपत्र च्यात्न पार्टीले निर्देशन नदिएको र निर्वाचन आयोगलाई पनि पुनः मतदान गर्न दबाव नदिएको प्रचण्डले प्रष्ट पारे ।
प्रचण्डले भने, ‘अपवादको रुपमा यो घटना घटेको छ । ५–६ दिन अगाडि मैले उम्मेदवारलाई रेणु दाहाललाई के भने भनें, देबी ज्ञवालीको मत अन्तर बढ्दै गएको थियो, करिब ४ हजार पुगेको थियो । जिते पनि जित्यौ, हारे पनि जित्यौ ढुक्कसँग बस्नु भनें । त्यसपछि तीन दिनसम्म चितवनमा कसैसँग सम्पर्क भएको छैन ।’
उनले सम्बोधनकाक्रममा भरतपुर घटनाबारे आफुपनि एमाले र केपी ओलीले भनेकै पक्षमा रहेको समेत बताए । उनले भने व्यक्तिगतरुपमा म प्रतिपक्षिले उठाएकै कुरामा सहमत छु ।
भरतपुर घटनाबाट पाठ सकिएको र अब सबैभन्दा निष्पक्ष चुनाव त्यहीँ हुने भन्दै प्रचण्डले भने, ‘सबैको आँखा भरतपुरमा छ । यो विषय अदालतमा पनि पुगेको छ । अब सबैभन्दा निष्पक्ष चुनाव भरतपुरमै हुन्छ ।’
प्रकाशित मितिः २०७४ जेठ २३
वि.सं.२०७४ जेठ २३ मंगलवार १६:१५ मा प्रकाशित