भीमदत्तनगर । कञ्चनपुरका पत्रकारद्वय खेम भण्डारी र गणेशदत्त भट्टलाई जिल्ला प्रहरी कार्यालय कञ्चनपुरले आज पक्राउ गरेको छ ।

जिल्ला प्रहरी कार्यालय कञ्चनपुरको हिरासतमा रहेका शुक्लाफाँटा नगरपालिकाका पूजा नाथ र कञ्चन नाथका परिवारले दिएको उजुरीका आधारमा भीमदत्तनगरबाट प्रकाशित हुने मानसखण्ड दैनिकका प्रकाशक/सम्पादक भण्डारी र सोही दैनिकका कार्यकारी सम्पादक रहेका भट्टलाई पक्राउ गरिएको प्रहरीले जनाएको छ । तर मिति समेत नखुलाइएको पुर्जिमा सार्वजनिक अपराध लेखिएको छ ।

पूजा र कञ्चनलाई केही दिनअघि प्रहरीले मादक पदार्थ सेवन गरी होहल्ला गरेको भन्दै पक्राउ गरी सार्वजनिक अपराध ऐनअन्तर्गत कारबाही अघि बढाएको विषयमा मानशखण्ड दैनिकले समाचार सम्प्रेषण गरेको थियो । जिल्ला प्रहरी कार्यालय कञ्चनपुरका प्रवक्ता प्रहरी नायब उपरीक्षक भीम दाहालले प्रहरीको हिरासतमा रहेका कञ्चनका बुबा खेमराज नाथले छोरी र बहिनी पूजाका विषयमा निरन्तर सञ्चार माध्यममा समाचार आएर सामाजिक बेइज्जत भएको भन्दै सार्वजनिक अपराध ऐनअन्तर्गत पत्रकारलाई कारबाहीका लागि उजुरी दिएको बताए ।

लामो समयदेखि पत्रकारितामा सक्रिय भण्डारी न्यूनतम पारिश्रमिक निर्धारण समितिका पूर्व अध्यक्ष हुन् । भण्डारीले भीमदत्तनगरमा रेडियो महाकाली र मानसखण्ड दैनिक पत्रिका सञ्चालन गर्दै आएका छन् । समाचार लेखेकै आधारमा पत्रकारलाई पक्राउ गरिएको घटनाप्रति नेपाल पत्रकार महासङ्घ कञ्चनपुर शाखा, केन्दीय कार्यालय, प्रेस चौतारी नेपाल लगायत संघ संस्थाले खेद प्रकट गरेको छ ।
प्रहरीले पक्राउको बहाना उजुरीलाई बनाएपनि घटना नियोजित रहेको स्थानीय पत्रकारहरु बताउँछन् ।

यस्तो थियो पक्राउ गराउने समाचार !

कञ्चनपुरका एसपीमाथि २ युवती अपहरणको आरोप