काठमाडौ। यसपाली ठमेलबासी र ठमेल घुम्न आउने पर्यटकहरुले ठमेलमै बसेर रोपाईं हेर्न पाए । ठमेललाई व्यवस्थित गर्न र सुधार गर्नका लागि काम सुरु गरेको ८३ औं दिन पुग्दा पनि ठमेलको अवस्थामा खासै सुधार नआएपछि ठमेलका स्थानीय र व्यवसायीहरुले सडकमै रोपाईं जात्रा गरेका हुन् ।
स्थानीयहरुले विहानै उठेर खेतमा गइ बिऊ ल्याएर सडकमा धान रोपे । ठमेलको मुख्य नाका मध्येको एक सोह्रखुट्टे उकालोबाट छिर्ने मनाङ होटल अगाडिको नाकामा उनीहरुले बाटो छेकेरै रोपाईं गरे ।
दुबै पट्टिबाट सवारी आवतजावत रोक लगाइ स्थानीयहरु कोही खेत रोप्ने मुडमै आए, कोही रमाइलो गर्न आए त कोही अवसर पारेर हिलो सडकमा छिरे । पानी जमिराखेको सडकमा उनीहरुलाई रोपाईं गर्नका लागि योग्य जमिन बनाउन समयनै लागेन । व्यंग्यात्मक रुपमा छिटो सडक निर्माण गर्न दबाब दिने उद्देश्यले उनीहरुले १५ असारको अवसर पारेर रोपाईं जात्रा गरेका हुन् ।
काठमाडौं गेष्ट हाउस अगाडि सधैं पानी जम्ने समस्या भएपछि ठमेल पर्यटन विकास परिषद्को नेतृत्वमा काठमाडौं गेष्ट हाउसदेखि सोह्रखुट्टेसम्मको ढल निकासका लागि सडक भत्काइएको थियो । तथापी, परिषद्ले ढल निकासको काम सम्पन्न गरेको छ । तर, ढल निकासका लागि काम गर्दा मेलम्ची खानेपानीले बिच्छ्याएको पाइप काटिएको भन्दै पुन सडक भत्काए पछि यहाँ समस्या देखिएको हो । अहिले फेरि मेलम्ची खानेपानीले पुराना खानेपानीको पाइप काटिदिएको भन्दै सो क्षेत्रमा सडक निर्माणको काम ढिलाई भइरहेको छ । यसरी नेपाल आएका ८० प्रतिशत पर्यटक घुम्न आउने ठमेलका सडकको अवस्था ८३ औं दिनसम्म उस्तै रहेपछि स्थानीय र व्यवसायीहरुले दबाब स्वरुप रोपाईं जात्रा गरेका हुन् ।
प्रकाशित मितिः २०७४ असार १५
वि.सं.२०७४ असार १५ बिहीवार १६:१० मा प्रकाशित
