काठमाडौ । व्यवस्थापिका संसदको सोमवारको बैठकले आगामी आवको बजेट बहुमतले पारित गरेको छ । संसदको दोस्रो बैठकले विनियोजन विद्येयक २०७४ पारित गरेको हो ।
पहिलो पटक संघीय संरचना अनुसार स्थानीय तहको लागि समेत रकम विनियोजन गरिएको बजेट गत जेठ १५ गते सार्वजनिक गरिएको थियो । अर्थमन्त्री ज्ञानेन्द्रबहादुर कार्कीले सो विद्येयक संसदमा पारितको लागि पेश गरेका थिए । बैठकले आर्थिक विद्येयक २०७४ माथि विचार गरियोस् भनी प्रस्तुत प्रस्तावलाई सर्वसम्मतीले स्वीकृत गरेको छ । सभामुख ओनसरी घर्तीले सो विद्येयकमा यही असार २९ गते दफावार छलफल हुने घोषणा गरिन् ।
बैठकले राष्ट्र ऋण उठाउने विधेयक, २०७४ लाई सर्वसम्मतिले स्वीकृत गर्यो । त्यसअघि सांसदहरु प्रेम सुवाल, अनुराधा थापा र डिल्लीप्रसाद काफ्लेले विभिन्न मन्त्रालयको विभिन्न शीर्षकको खर्च रकम घटाइयोस् भनी प्रस्तुत गरेका प्रस्तावलाई बैठकले अस्वीकृत गरेको थियो ।
प्रकाशित मितिः २०७४ असार २६
वि.सं.२०७४ असार २६ सोमवार १८:३५ मा प्रकाशित