वीरगन्ज । समयमै पानी परेको र मलखाद पनि समयमै उपलब्ध भएकोले आलसम्म बारामा ८० प्रतिशत धान रोपार्इँ सम्पन्न भएको छ ।
जिल्ला कृषि विकास कार्यालय बाराका अनुसार जिल्लामा ६२ हजार ३ सय ५४ हेक्टर क्षेत्रफलमा धानखेती हुने गरेका छन् । ती मध्ये ३३ हजार ३ सय ५४ हेक्टर सिञ्चित र २९ हजार असञ्चित क्षेत्रफल रहेका छन् । जिल्लामा अहिलेसम्म ५० हजार हेक्टर क्षेत्रफलमा धान रोपाइँ सम्पन्न भएको छ ।
गतवर्ष ६० हजार ४ सय ४० हेक्टर क्षेत्रफलमा भएको धानखेतीबाट दुई लाख २८ हजार ६ सय ८२ मेट्रिक टन धान उत्पादन भएको थियो । यो वर्ष हालसम्मको समग्र स्थिति राम्रो रहेकोले प्रति हेक्टर ४. ४ प्रतिशत मेट्रिक टन धान उत्पादन हुनसक्ने पूर्वानुमान गरिएको जिल्ला कृषि विकास कार्यालय बाराका वरिष्ठ कृषि विकास अधिकृत शिवरत्न साहले बताए ।
जिल्लामा ८० प्रतिशत किसान धानखेतीमा आश्रित छन् । तीमध्ये ६५ प्रतिशत किसानले मन्सुली, सावित्री, स्वर्णासव—१, राधा, बास्मतीजस्ता जातका धान लगाउँदै आएको बताइएको छ ।
धानखेती गर्ने किसानलाई यो वर्ष सरकारले मसिना तथा बास्नादार कार्यक्रमअन्तर्गत ७५ प्रतिशत अनुदानमा २५ मेट्रिक टन धानको बीउ वितरण गरेको छ भने प्रोत्साहन भत्ताअन्तर्गत धानखेती गर्ने किसानलाई प्रति हेक्टर रु ५ हजार र कृषि औजारमा समेत सुविधा दिन थालेपछि किसान धानखेतीतर्फ आकर्षित भएका छन् ।
यसैगरी पर्सा जिल्लामा हालसम्म ४५ प्रतिशत क्षेत्रफलमा मात्र धान रोपाइँ भएको जिल्ला कृषि विकास कार्यालय पर्साले जनाएको छ । रासस
प्रकाशित मितिः २०७४ असार ३१
वि.सं.२०७४ असार ३१ शनिवार १५:०६ मा प्रकाशित
