नवलपरासी । कावासोती नगरपालिकाको चार दिन सम्म चलेको प्रथम नगरसभाले आर्थिक बर्ष २०७४÷०७५ को नीति बजेट र कार्यक्रहरु स्वीकृत गरेको छ । सभाले स्वयम् सेविकाहरुका लागि मासिक चार सयमा रु ६०० सय बृद्धि गरी एक हजार कायम गरेको छ । मुसहर र माझीहरुका लागि नगर विपन्न आवास कार्यक्रम सञ्चालनमा ल्याएको छ ।
करमा अधिक योगदान: नागरिकको उच्च सम्मान,नगर समृद्धको नयाँ चरणः ब्यापक औद्यागिकिकरण, नगरमा सहकारी: घरघरमा रोजगारी, नगरको पर्यटन: नगरको समृद्धि र पहिचानको साधन,स्वास्थ्य बिमा निशुल्क उपचार: स्वस्थ्य नागरिक जिम्मेवार नगर सरकार , आमा स्वास्थ्य कार्यक्रम जस्ता कार्यक्रमहरु सञ्चालनमा ल्याइएको छ । यो नाराले नगरको विकासमा काम हुने कार्यपालिकाका सदस्य गीता विकले बताए ।
मातृ मृत्यूको प्रमुख कारण रहेको बालबाविवाह अन्त्य गर्ने कार्यक्रम नीति कार्यक्रममा छ । गर्भवती तथा सुत्केरीलाई पोषण सहित आबश्यक सम्पूर्ण सेवा निशुल्क र सहज ढङ्गले उपलब्ध गराउन आमा स्वस्थ्य कार्यक्रम सञ्चालनमा ल्याइनेछ । प्रसुती सेवाको अभावमा आमाको ज्यान जान सक्ने अबस्थाको अन्त्य गरी प्रत्येक वडामा दक्ष स्वास्थ्यकर्मी सहितको प्रसुती केन्द्र को पनि स्थापना गरिने कार्यक्रम छ ।
नगरपालिकामा पाँच बर्ष भित्रमा सर्पदंशको उपचार सहितको ५० शैयाको सुबिधा सम्पन्न अस्पताल सञ्चालनमा ल्याउनेछ । युवा स्वबलम्बन कार्यक्रम मार्फत बार्षिक ५ सय युवालाई स्वरोगार बनाउने नगरले कार्यक्रम तय गरेको छ । पुराना चलनचल्तीमा रहेका तर लगत कट्टा नभएका बाटोहरुलाई यथास्थितिमा बाटो लगत कट्टा स्वीकृत दिइने नगर सभाले पारित गरेको छ ।
फोहोर ब्यवस्थाका लागि आधुनिक फोहोर ब्यवस्थापन केन्द्र स्थापना,प्रदेश स्तरमा निर्माण हुने मेडिकल कलेज कावासोतीमा निर्माणका लागि प्रदेश सरकार संग समन्वय गर्ने र त्यसका लागि जग्गा उलपब्ध गराउने निर्णय सभाले गरेको छ । दुई बर्षभित्रमा कावासोती नगरपालिकालाई बालमैत्री नगरको रुपमा स्थापित गर्न बालमैत्री स्थानीय शासन कार्यक्रम सञ्चालनमा ल्याइउने नीति नगरसभाले गरेको छ । ज्येष्ठ नागरिकको सुबिधाका लागि दिवा सेवा केन्द्र , प्लटिङ्ग प्रयोजनका लागि कम्तीमा आठ मिटरबाटो ढल, बिजुली र पानीको ब्यवस्था र पाँच प्रतिशत खुल्ला क्षेत्र समेत ब्यवस्था गरेको छ ।
नगर यायायात गुरु योजनालाई पुनरावलोकन गरी वडा नं. १७ लाई समेत समावेश गरेको छ । जसका आधारमा रिङ्गरोडको ब्यवस्था गरी नगरमा नगरबस सञ्चालन गर्ने कार्यक्रम छ । बसपार्क , रंगशाला , सभागृह पोखरी ताल पार्क , कर्भडहल नारायणी नदी तटबन्धन केरुङ्ग खोला नियन्त्रण , मानव वन्यजन्तु द्धन्द्ध नियन्त्रणका साथै उज्योलो कावासोती कार्यक्रम सञ्चालनमा ल्याएको छ । यस बर्ष वडा कार्यालयहरु निर्माण गर्नका लागि बजेट ब्यवस्था गरिएको छ ।
कार्यपालिका सदस्य लक्ष्मीप्रसाद पौडेलले आर्थिक बर्ष २०७४/०७५ का लागि एक अर्ब १० करोड ६४ लाख ५५ हजार बराबरको आय ब्यय प्रस्तुत गर्नु भयो । प्रस्तुत नीति कार्यक्रम र बजेट अत्याधिक बहुमतले पारित गरेको छ । सभाले आन्तरिक आय रु १० करोड ६९ लाख ५५ हजार बाह्य र आय रु ९९ करोड ९५ लाख बिनियोजित गरेको छ । भने ब्यय तर्फ चालु रु ६ करोड २९ लाख ८९ हजार र पुँजीगत खर्च ९२ करोड ३४ लाख ६६ हजार र सामाजिक सुरक्षा तर्फ रु १२ करोड रहेको छ ।
नगर प्रमुख चन्द्रकुमारी पुनको अध्यक्षतामा भएको सभाले कावासोती नगरपालिकाको विनियोजन बिधेयक , आर्थिक बिधेयक पारित गरेको हो ।यी बिधयेक पारित संगैं नगरपालिकाको चालु आर्थिक बर्षको कार्यक्रम , राजश्वका दररेटहरु कार्यान्वयनमा आउने छन् ।
प्रकाशित मितिः २०७४ साउन ३
वि.सं.२०७४ साउन ३ मंगलवार १५:१९ मा प्रकाशित
