काठमाडौ । सानिमा माई हाइड्रोपावर लिमिटेडले आगामी साउन २९ गते शतप्रतिशत हकप्रद सेयर निष्काशन गर्न लागेको छ । कम्पनीले मंगलबारसम्म १५ दिने सुचना जारी गरी सेयर निष्काशन गर्न लागेको हो ।
१ बराबर १ अनुपातमा १ अर्ब ५ करोड ५० लाख रुपैयाँ बराबरको सय रुपैयाँ अंकित १ करोड ५ लाख ५० हजार कित्ता सेयर निष्काशन गरिने कम्पनीका प्रमुख कार्यकारी अधिकृत सुवर्णदास श्रेष्ठले जानकारी दिए ।
‘साउनको अन्तिम साता हकप्रद सेयर निष्कासन गर्ने तयारी छ, ’उनले भने, ‘सम्पूर्ण सेयर धनीले ३५ दिनभित्रमा आवेदन दिइसक्नुपर्नेछ ।’ पहिलो चरणमा संस्थापक र दोस्रो चरणमा सर्वसाधारण सेयर धनीलाई लक्षित गरेर सेयर निष्काशन गरिने छ ।
सम्पूर्ण सेयर धनीले अहिले जारी सेयर बराबरकै थप सेयर पाउने श्रेष्ठले बताए । हकप्रद सेयर प्राप्त गर्ने सेयरधनीलाई सानिमा हाइड्रो ग्रुपले निर्माण गर्ने आयोजनामा स्वतः लगानीको अवसर मिल्ने उनले बताए ।
कम्पनीले सेयर निष्काशन तथा विक्री प्रबन्धकमा सनराइज क्यापिटललाई तोकेको छ । असोजभित्र सेयर निष्काशन गरेर बाँडफाँट गरिने उपकार्यकारी निर्देशक बिजेन्द्र श्रेष्ठले बताए ।
सेयर विक्रीबाट जम्मा भएको पुँजी ५४ मेगावाटको मध्य तामोर र २८.१ मेगावाटको तल्लो लिखु जलविद्युत आयोजनामा लगानी गरिनेछ । हकप्रद सेयर निष्काशनपछि सानिमा माईको चुक्ता पुँजी २ अर्ब ११ करोड ५० लाख पुग्नेछ । जलविद्युत विकासमा सफल बन्दै गएको सानिमा हाइड्रो ग्रुपले निर्माण गरेका ३१.५ मेगावाट बराबरका ३ जलविद्युत केन्द्र संचालनमा छन् । उर्जाखबरबाट
प्रकाशित मितिः २०७४ साउन ८
वि.सं.२०७४ साउन ८ आइतवार १६:१५ मा प्रकाशित