बेलायतमा सन् २०४० देखि पेट्रोल र डिजेलबाट चल्ने सवारी साधनलाई प्रतिबन्ध लगाइने भएको छ । वायु प्रदूषण नियन्त्रण गर्ने पहलस्वरुप सन् २०४० देखि डिजेल र पेट्रोलबाट चल्ने नयाँ सवारी साधन दर्ता नगरिने व्यवस्था गर्न लागेको बिबिसीले जनाएको छ ।
यसबारेको कार्ययोजना तयार भैरहेको छ । सरकारले डिजेल र पेट्रोलबाट हुने वायु प्रदूषण नियन्त्रणका लागि २५ करोड ५० लाख मिलियन पाउण्ड सहयोग समेत गर्नेछ । बेलायतमा अदालतले नै हावामा रहेको प्रदूषणको मात्रा घटाउन नयाँ योजना ल्याउन आदेश दिएको थियो ।
केही दिनअघि मात्र फ्रान्सका राष्ट्रपतिले पनि सन् २०४० भित्र डिजेल र पेट्रोलबाट चल्ने सवारी साधनमा प्रतिबन्ध लगाउने योजना सार्वजनिक गर्नुभएको थियो । बढ्दो वातावरण प्रदूषणलाई मध्यनजर गर्दै कार उत्पादक कम्पनी बिएमडब्लू तथा भल्भोले सन् २०१९ देखि विद्युतीय गाडी उत्पादन गर्ने घोषणा गरिसकेका छन् ।
प्रकाशित मितिः २०७४ साउन १३
वि.सं.२०७४ साउन १३ शुक्रवार १२:०६ मा प्रकाशित