आठ पटकका ओलम्पिक च्याम्पियन तथा १०० मिटर दौडका बादशाह उसैन बोल्ट आफ्नो खेल जीवनको अन्तिम प्रतिस्पर्धामा भने पराजित भएका छन् । बेलायतको लण्डनमा भइरहेको विश्व एथ्लेटिक्स च्याम्पियनसिप अन्तर्गत शनिबार राति भएको १०० मिटर दौडमा कीर्तिमानधारी जमैकाका बोल्टलाई पछि पार्दै अमेरिकाका जस्टिन गाट्लिनले स्वर्ण पदक जितेका छन् ।
बोल्टले रजत पदक पनि जित्न सकेनन् । उनी तेस्रो हुँदै काश्यक पदकमा चित्त बुझाउन बाध्य भए । निर्धारित दूरी ९ दशमलव ९२ सेकेण्डमा पूरा गर्दै ३५ वर्षका गाट्लिनले स्वर्ण पदक जितेका हुन् । यस्तै ९ दशमलव ९४ सेकेण्डमा दूरी पूरा गरेका अमेरिकाकै क्रिश्चियन कोलम्यानले रजत तथा ९ दशमलव ९५ सेकेण्डमा दूरी पूरा गर्दै बोल्टले काश्य पदक जिते । व्यक्तिगत स्पर्धामा बोल्टको यो खेल जीवनको अन्तिम प्रतिस्पर्धा हो ।
प्रकाशित मितिः २०७४ साउन २२
वि.सं.२०७४ साउन २२ आइतवार १६:०० मा प्रकाशित
