धादिङ । गजुरी सामुदायिक विकास समाज गजुरीको आयोजनामा धादिङको गजुरी गाउँपालिका –१,गजुरी बजारमा श्रीमद् भागवत महापुराण सप्ताह ज्ञान महायज्ञ सुरु भएको छ । गजुरी १ बाङगे स्थित रुद्रेश्वर महादेव मन्दिर परिसर सुधार भौतिक पूर्वाधार विकास, पुनरउत्थान एवं पुरातात्विक महत्वका सम्पदाहरुको संरक्षणार्थ महायज्ञ आयोजना गरिएको हो ।
महायज्ञको नेपाली सेना ६ न. बाहिनी बैरेनीका बाहिनीपति शुदर्शनविक्रम राणाले उद्घाटन गरेका थिए । उद्घाटन समारोहमा सयौं भक्तजनहरुको सहभागितामा कलश यात्रा गरिएको थियो ।
उद्घाटन कार्यक्रममा महापुराण वाचक शिरोमणि पण्डित दिपकप्रसाद पौडेलले सबैका लागि फाईदा पुग्ने पुराण श्रवण गर्न सबैलाई आग्रह गरेका थिए ।
यसैबीच रु १ देखि ५०० सम्म नगद दिनेलाई रसिद प्रदान, रु ५०१ देखि १,००० सम्म प्रदान गर्नेलाई रसिद र फूलटिका, रु १,००१ देखि २,००० प्रदान गर्नेलाई सम्मानपत्र र नाम वाचन, रु २,००१ देखि ३,००० प्रदान गर्नेलाई रामनामी ओढाई सम्मान, रु ३,००१ देखि ५,००० प्रदान गर्नेलाई फ्रेममा सम्मा पत्र राखेर अभिनन्दन, रु ५,००१ देखि १०,००० प्रदान गर्नेलाई चाँदीको फ्रेममा सम्मानपत्र सहित शिलालेखमा नाम, रु १०,००१ देखि २५,००० प्रदान गर्नेलाई चाँदीको फ्रेममा सम्मान पत्र सहित शिलालेखमा नाम (परिवार सहित), रु २५,००१ देखि ५०,००० सम्म सहयोग प्रदान गर्नेलाई मन्दिरको पूर्ण आजिवन सदस्यता प्रदान, रु ५०,००१ देखि रु १ लाख सम्म सहयोग गर्नेलाई दानबीर घोषणा सहित बाजागाजा सहित नगर परिक्रमा, रु १ लाखभन्दा माथि सहयोग गर्ने दाताहरुलाई मानार्थ अभिनन्दन प्रदान गरिने गजुरी सामुदायीक विकास समाजका सदस्य प्रतिक खरेलले जानकारी दिए ।
साउन २६ देखि सुरु भएको महापुराण भदौ २ गतेसम्म सञ्चालन हुनेछ । महापुराणमा सहभागी भई युवाको विकास प्रयासमा उत्साह प्रदान गर्न समाजले सबैसमक्ष आग्रह गरेको छ ।
प्रकाशित मितिः २०७४ साउन २७
वि.सं.२०७४ साउन २७ शुक्रवार १२:२७ मा प्रकाशित