पाँच दशकदेखि डुबानको पीडा सहँदै आएका नवलपरासीको सुस्ताबासीले गण्डक बाँधको भारततर्फ जाने नहर भत्काइदिएका छन् । पश्चिम गण्डक नहरका कारण डुबानमा परेको भन्दै सुस्ताबासीले फलामे पुल नजिकै नहरको बाँध भत्काउन पुगेका हुन् । उनीहरुले बाँध खनेर आफूहरुको खेतमा जम्मा भएको पानीको निकास दिनुपर्ने बताएका छन् ।
झण्डै २०० को संख्यामा रहेका सुस्ताबासीले ८–१० मिटर बाँध भत्काइसकेका छन् । तर, नहरमा पानी खसेको छैन । स्थानीय प्रशासनले स्थानयबासीलाई मनाउने प्रयास जारी राखेको छ र नहरमा पानी खस्न दिएको छैन ।
प्रमुख जिल्ला अधिकारी उदयबहादुर रानाले स्थानीयबासी बाँधमा पुगेको स्वीकार गरे । गण्डक बाँधका कारण नवलपरासीको ठूलो क्षेत्र डुबानमा पर्दैआएको छ । सुख्खायाममा भारतीय भूमि हराभरा हुने तर नेपाली भूमि सुख्खै रहने तर वर्षामा नेपाली भूमि डुबानमा पर्ने र भारतीय भूमि सुरक्षित रहने गर्दै आएको छ ।
गण्डक बाँधको मर्मतको जिम्मा भारतको हो भने पानी बाँडफाड बराबरी हुनुपर्ने भए पनि भारतले समयमै मर्मत नगर्ने र सुख्खायाममा पानी नछोड्ने गरिरहेको छ । गण्डक बाँध पीडितहरुले लामो समयदेखि आन्दोलन गर्दै आएका छन् ।
प्रकाशित मितिः २०७४ भदौ १
वि.सं.२०७४ भदौ १ बिहीवार १७:२९ मा प्रकाशित
