काठमाडौ । लोकसंगितका माध्यमबाट नेपालको नयाँ पर्यटन प्रोडक्ट अगाडि ल्याउने र कला संस्कृतिका साथै पर्यटनको प्रबद्र्धन गर्ने उदेश्यका साथ गोरुतिहारको दिन कार्तिक ३ गते शुक्रबार पर्यटनका लागि लोकसंगीत देउसी–भैलो कार्यक्रम हुने भएको छ । पर्यटन पत्रकार संघ(जाट–नेपाल) र नेपाली लोकबाजा संग्राहलयको संयुक्त आयोजनामा नेपाल पर्यटन बोर्डमा शुक्रबार बिहान ११ बजेदेखि दिउँसो ३ बजेसम्म उक्त देउसी–भैलो कार्यक्रम हुन लागेको हो ।
देउसी–भैलो कार्यक्रमलाई नेपाल पर्यटन बोर्डले बिशेष सहयोग रहेको छ । देउसी–भैलोमा मौलिक नेपाली लोकसंगीतका प्रस्तुतीहरु रहनेछन् । कार्यक्रममा पर्यटन क्षेत्रका महत्वपूर्ण व्यक्तित्वहरु र अधिकाँश संचारमाध्यमहरुको उपस्थिति रहनेछ । विशेषतः पर्यटन क्षेत्रमा लुकेर रहेका प्रोडक्टहरुलाई उजागर गर्ने उदेश्यका साथ पर्यटनका लागि लोकसंगीत देउसी–भैलो कार्यक्रमको आयोजना गरिएको जाट–नेपालका अध्यक्ष नारायण भण्डारीले बताए । देउसी–भैलोमा सहभागी हुन उनले पर्यटन क्षेत्रका सबै संघसंस्था,पदाधिकारी, सदस्यहरु उच्च पदस्थ व्यक्तित्वहरु र संचारमाध्यमलाई अनुरोध पनि गरेका छन् ।
प्रकाशित मितिः २०७४ कार्तिक २
वि.सं.२०७४ कात्तिक २ बिहीवार १०:२५ मा प्रकाशित