काठमाडौ । पछिल्लो समय विकराल रुप लिदै गरेको तरलता समस्याले समाधानको बाटो समातेको छ । तरलताको अवस्था सहज बनाउन नेपाल राष्ट्र बैंकले बुधबार बैंकिग प्रणालीमा थप १० अर्ब रुपैयाँ पठाउने भएको छ । सरकारको विकास ऋणपत्र सिधै खरिद गर्ने उपकरणमार्फत राष्ट्र बैंकले उक्त रकम वित्तीय बजारमा पठाउन लागेको हो ।
बैंकहरुको माग अत्याधिक भएपछि राष्ट्र बैंकले आज दश अर्ब रुपैयाँ बजारमा पठाउन लागेको हो। राष्ट्र बैंकका अनुसार मंगलबारसम्म बैंकिग प्रणालीमा ३१ अर्ब रुपैयाँ अधिक तरलता रहेको छ । गत आइतबार राष्ट्र बैंकले विकास ऋणपत्र उपकरण मार्फत पाँच अर्ब रुपैयाँ बजारमा पठाएको थियो ।
अन्तर बैंक ब्याजदर पाँच प्रतिशत भन्दा बढी पुग्ने अवस्थामा राष्ट्र बैंकले बैंक तथा वित्तीय संस्थाहरुलाई पैसा लिन बोलाउने गरेको छ । बैंकहरुलाई स्थाई तरलता सुविधा अन्तर्गत विकास ऋणपत्र र ट्रेजरी विल धितोमा राखेर रकम लिन सक्ने सुविधा छ ।
गत आइतबार राष्ट्र बैंकले विकास ऋणपत्र खरिद गरेर बैंकहरुलाइए पाँच अर्ब रुपैयाँ दिएको थियो । सो क्रममा १८ वाणिज्य बैंक, दुई विकास बैंक र एक वित्त कम्पनीगरी २१ संस्थाले १९ अर्ब रुपैयाँ माग गरेका थिए ।
बैंकहरुले थप रकम माग गरेको अवस्थामा ब्याजदर करिडोर अन्तर्गत रिपो मार्फत आवश्यक रकम पठाउदै लग्ने राष्ट्र बैंकको नीति छ । तर पछिल्लो दुई साता यता कुनैपनि बैंक तथा वित्तीय संस्थाले रिपो मार्फत पैसा लिन नआएको राष्ट्र बैंकको भनाई छ ।
२०७४ पुष १९ गते प्रकाशित
वि.सं.२०७४ पुस १९ बुधवार १०:४३ मा प्रकाशित