काठमाडौं। नेपाल बैंकर्स संघको अध्यक्षमा ज्ञानेन्द्र ढुङ्गाना चयन भएका छन् भने उपाध्यक्षमा कोही ईच्छुक देखिएनन् । अध्यक्षमा निर्बिरोध निर्वाचित भएका ज्ञानेन्द्र ढुङ्गाना एनबी बैंकका प्रमुख कार्यकारी अधिकृत हुन्। बिहिबार साँझ बस्ने बिशेष साधारणसभाले उनको उमेद्वारीलाई अनुमोदन गर्ने छ। उनी आगामी दुई बर्षका लागि अध्यक्ष चुनिने छन्।
अध्यक्षमा ढुङ्गाना औपचारिक रुपमा चयन भएपछि फेरि उपाध्यक्ष पद खाली हुने छ। रिक्त उपाध्यक्ष पद सहमतिमा पूर्ति गर्ने वा कार्यसमितिबाट नियुक्त गर्ने बारे टुङ्गो लागिसकेको छैन। अघिल्लो पटक दुई जना उपाध्यक्ष पद रहेकोमा कसैले खाने इच्छा नदेखाएपछि खारेज गरिएको थियो।
अध्यक्षमा ढुङ्गानावाहेक कसैको पनि उमेद्वारी नपरेपछि उनी निर्बिरोध भएका हुन्। संघमा उपाध्यक्ष रहेका ढुङ्गाना अध्यक्ष अनिल शाह बैंकिङबाट बाहिरिएपछि कार्यवाहक अध्यक्ष भएका थिए। ढुङ्गानालाई नै अध्यक्ष बनाउन मोटामोटी सहमति बनेपछि बाँकी बैंकरले उमेद्वारी दिएनन्।
बैंकरहरुले उपाध्यक्षका लागि कृषि विकास बैंकका प्रमुख कार्यकारी अधिकृत लीला प्रकाश सिटौलालाई बनाउन खोजिरहेका छन्। तर उनले अहिलेसम्म हुन्छ भन्ने जवाफ दिएका छैनन्। साथै सनराइज बैंकका प्रमुख कार्यकारी अधिकृत रत्नराज बज्रचार्य, नेपाल इन्भेष्टमेन्ट बैंकका प्रमुख कार्यकारी ज्योतिप्रकाश पाण्डेको पनि उपाध्यक्षका लागि सम्भावना रहेको छ।
२०७४ पुष २० गते प्रकाशित
वि.सं.२०७४ पुस २० बिहीवार ११:२६ मा प्रकाशित