उदयपुर । अघिल्ला वर्षहरुमा कमलानदी त्रिवेणी मेलामा भोटे घोडाको कारोबार हुने गरेको थियो तर यही मेलामा यसपालि भोटे कुकुरको कारोबार बढेको छ । भोटे घोडा लोप हुन थालेपछि जिल्लाको कटारीस्थित कमलानदी त्रिवेणी मेलामा यसको किनबेच नभएकाले यस पटक भने भोटे कुकुरको कारोबार बढेको छ ।
माघ १ गतेदेखि सञ्चालन भएको त्रिवेणी मेलामा अहिलेसम्मकै सबैभन्दा बढी भोटे कुकुरको किनबेच भएको मेला व्यवस्थापन समितिका अध्यक्ष नरबहादुर तामाङले बताए ।
विगतका वर्षमा सोलुखुम्बु र ओखलढुंगाको रुम्जाटार क्षेत्रबाट झारिने भोटे घोडाको किनबेच धेरै हुने गरेपनि अहिले तिनको प्रयोग र प्रचलन घट्दै गएकाले मेलामा पनि भोटेघोडाको किनबेच ठप्प हुन पुगेको मेला व्यवस्थापन समितिका सदस्य केदार धमलाले बताए ।
उनका अनुसार अहिले सोलुखुम्बु र ओखलढुंगाबाट खरिद गरेर झारिएका भोटेकुकुर र तिनका छाउरासमेतको किनबेच बढेको हो । एउटा भोटे कुकुरको मूल्य रु आठ हजारदेखि रु १० हजारसम्म पुगेको छ भने छाउरा रु तीन हजारसम्ममा बिक्री भइरहेका छन् । सोलुको हिमाली क्षेत्रबाट झारिएका भोटेकुकुर अहिले तराईको धनुषा, सप्तरी, सिरहा, महोत्तरीसहित भारतको बिहारसम्मका ग्राहकले किनेर लगेका छन् ।
माघको ३ गतेदेखि सोमबारसम्ममा झण्डै रु चार लाखसम्मको भोटेकुकुरको कारोबार भएको समेत त्रिवेणी मेला व्यवस्थापन समितिले जनाएको छ ।
त्रिवेणी मेलामा हिमाली भोटेकुकुरको कारोबार ह्वात्तै बढेपछि हिमाली सोलु र ओखलढुंगा क्षेत्रबाट थुप्रै भोटेकुकुर मेलामा कारोबारका लागि ल्याउने कार्यसमेत भइरहेको छ ।
माघ १ गते देखि शुरु भएको पन्ध्र दिने मेलामा अहिलेसम्म झण्डै रू दुई करोडको कारोबार भइसकेको छ भने सातलाख भन्दा बढीले त्रिवेणी धामको दर्शन गरेको मेला व्यवस्थापन समितिले जनाएको छ ।
२०७४ माघ १५ गते प्रकाशित
वि.सं.२०७४ माघ १५ सोमवार १४:१८ मा प्रकाशित