काठमाडौ । एनसेलको लाभांश, पुस मसान्तको कर लगायतका कारणले अहिले बैङ्कहरुमा तरलता अभाव भएको बैङ्कहरुले बताउदै आएका छन् । तरलता अभाव समाधानकै लागि विभिन्न चरणमा राष्ट्र बैङ्कले ५२ अर्ब रुपैया बजारमा पठाईसकेको छ । तर पछिल्लो हप्तामा अन्तर बैङ्क ब्याजदर बढेपछी पुनः राष्ट्र बैङ्कले बजारमा रिपोे जारी गरेको छ ।
बैंक तथा वित्तीय संस्थाहरुको अन्तर बैंक ब्याजदर पाँच प्रतिशत नाघेपछि राष्ट्र बैंकले हस्तक्षेप गरी दश अर्बको रिपो जारी गरेको छ । बजारमा तरलता (लगानी योग्य पुँजी) अभाव भएको भन्दै बैंकहरुले अन्तर बैंक ब्याजदर बढाउन थालेपछि राष्ट्र बैंकले बैंकिङ प्रणालीमा बुधबार दश अर्ब रुपैयाँ पठाउन लागेको हो ।
राष्ट्र बैंकका अनुसार अहिले बैंकिङ प्रणालीमा तरलता घटेर १८ अर्ब को हाराहारीमा रहेको छ । तरलता बढाउन केन्द्रीय बैंकले थप रकम प्रवाह गर्न लागेको राष्ट्र बैंकले जनाएको छ । चालु आर्थिक वर्षमा राष्ट्र बैंकले ७ पटक रिपो जारी गरी ५२ अर्ब ४५ करोड रुपैयाँ बजारमा पठाई सकेको छ ।
एक साताअघिसम्म अन्तरबैंक ब्याजदर ३ प्रतिशत भएकोमा एक साताका बीचमा बढेर ५ प्रतिशत नाघेको छ । अन्तरबैंक ब्याजदर स्थिर भएका कारण डेढ महिनादेखि राष्ट्र बैंकले रिपो जारी गर्न पाएको थिएन् ।
तरलता कम भएपछि बैंकहरुको अन्तर ब्याजदर समेत पाँच प्रतिशत नााघेको राष्ट्र बैंकको भनाई छ । ब्याजदर करिडोर नीति अन्तर्गत अन्तर बैंक ब्याजदर पाँच प्रतिशत पुगेपछि राष्ट्र बैंकले बजारमा रकम पठाउने गर्दे आएको छ । यो रकम बैंकहरुले लगेपछि अन्तर बैंक ब्याजदर पाँच प्रतिशतमै सिमित हुने छ ।
रिपोमा बैंक तथा वित्तीय संस्थाले बुधबार (१७ गते) बोलकबोल गर्नुपर्नेछ । राष्ट्र बैंकले ५ प्रतिशत ब्याजदरमा रिपोमार्फत उक्त रकम बजारमा पठाउन लागेको हो । रिपोको म्याद फागुन २ गतेसम्म रहेको छ ।
२०७४ माघ १७ गते प्रकाशित
वि.सं.२०७४ माघ १७ बुधवार १३:३१ मा प्रकाशित
