काठमाडौ । सर्वोच्च अदालतले एभरेष्ट होटलको सेयर विवादको पारिवारिक मुद्दामा सञ्चालक मशकुर अहमद लारी र नज्मा अहमद लारीको पक्षमा फैसला सुनाएको छ । फैसलासँगै एभरेष्टका अर्का संस्थापक मकबुल अहमद लारीका छोरा मुजफ्फर अहमद लारीले सेयरमा हिस्सा नपाउने भएका छन् ।
भूकम्प पछि बन्द अवस्थामा रहेको पाँच तारे होटल एभरेष्टको सेयर विवादलाई सर्वोच्चले निर्णयमा पुर्याएको हो । प्रधानन्यायाधीस गोपालप्रसाद पराजुली र न्यायाधीस पुरुषोत्तम भण्डारीको आइतबारको इजलासले एभरेष्टको सेयरमा कायम पारिवारिक विवादलाई टुंगो लगाएको हो ।
भूकम्पका कारण होटल बन्द भए पछि मकबुलका छोरा मुजफ्फर अहमद लारी र मकबुलका भतिज मसकुर अहमद लारीका बिचमा होटलको सेयर स्वामित्वको विवाद चर्किएको थियो । होटलका संस्थापक मकबुलको भारतको लखनउ बसाईका क्रममा निधन भएको थियो ।
सन् १९८१ देखि मकबुल अहमद लारीले झण्डै साढे तीन करोड रुपैयाँको पुँजीमा एभरेष्ट होटल सुरु गरेका थिए । उनले होटेलको आधा स्वामित्व आफ्नै भतिज मसकुर अहमद लारीको नाममा हस्तान्तरण गरी व्यवस्थापनको जिम्मा दिएका थिए ।
उनले होटलमा आफ्ना छोरालाई प्रवेश नगराई भतिजालाई भित्र्याएका थिए । उनको निधनसँगै छोरा तथा श्रीमती र भतिजाको बिचमा होटलको स्वामित्व विवाद चुलिएको थियो । अदालतले मकबुलका भतिजको पक्षमा फैसला गरेको हो ।
२०७४ माघ २२ गते प्रकाशित
वि.सं.२०७४ माघ २२ सोमवार २०:०१ मा प्रकाशित