काठमाडौं । आठ वर्ष अगाडी नै सिइओ भईसकेका अनिल शाह घटुवा हुदै पुनः नबिल बैङ्क फर्किएका छन् । प्रमुख कार्यकारी अधिकृतको रुपमा दुईवटा बैङ्कमा करिब डेढ दशक कार्य गरेका शाह अन्नत पुन डेपुटीमा घटुवा हुदैँ नबिल फर्किएका हुन् ।
शाह आठ वर्षे कार्यकाल पुरा गरेर मेगा बैंकबाट बाहिरिएका थिए । मेगामा काम गर्दै गर्दा सेञ्चुरी बैंकमा जानका लागि करार सम्झौता गरे पश्चात उनी विवादमा आएका थिए ।
तोकिएको तलव र सुविधामा राष्ट्र बैङ्कले अंकुश लगाएसंगै शाहले सेञ्चुरीसंगको सम्बन्ध टुङ्ग्याएका थिए । सेञ्चुरीमा कुरा नमिलेपछी शाह पहिले नै काम गरेको नबिल बैंकका प्रमुख कार्यकारी अधिकृत नियुक्त भएका थिए ।
तर राष्ट्र बैंकले एक बैंकबाट अर्को बैंकमा प्रमुख कार्यकारी भएर जानका लागि ६ महिनाको कुलिङ पिरियड अनिवार्य गरेपछि शाहको नियुक्ति नबिल बैंकले खारेज गरेको थियो । त्यसपछि नबिलले शाहलाई डेपुटी प्रमुख कार्यकारी अधिकृतका रुपमा नियुक्त गरेको थियो ।
३२ बर्ष लामो बैंकिङ करियरलाई बिराम लगाउँदै प्रमुख कार्यकारी अधिकृतबाट शशिन जोशीले अवकाश लिएपछि शाह नबिलको डेपुटी सिइओमा नियुक्त भएका हुन् । जोशी औपचारिक अवकाशअघि बिदामा बसेका छन् ।
जोशी अवकाश भएपछि डेपुटी प्रमुख कार्यकारी अधिकृत शाहलाई कामु प्रमुख कार्यकारी अधिकृतको जिम्मेवारी दिइएको हो । कुलिङ पिरियडका कारण शाह जेठपछि मात्र प्रमुख कार्यकारीका लागि योग्य हुने छन् ।
२०७४ फाल्गुण ४ गते प्रकाशित
वि.सं.२०७४ फागुन ४ शुक्रवार १५:३१ मा प्रकाशित