काठमाडौ । सूर्या लाईफ इन्स्योरेन्स कम्पनीले २८ करोड ८७ लाख रुपैँयाको हकप्रद जारी गर्नको लागि धितोपत्र बोर्डबाट स्वीकृती पाएको छ । कम्पनीले पुस २४ गते हकप्रदको लागि आवेदन दिएको थियो ।
कम्पनीले चैत १ गते ४० प्रतिशत अर्थात १० बराबर ४ अनुपातमा हकप्रद निष्काशनको लागि अनुमती प्रप्त गरेको हो । यससंगै कम्पनीलाई २८ लाख ८७ हजार ५ सय कित्ता हकप्रद बेच्नको लागि बाटो खुलेको छ ।
७२ करोड १८ लाख ७५ हजार रुपैँया चुक्ता पूँजी रहेको कम्पनीको हकप्रद समेत गरेर एक अर्ब एक करोड छ लाख रुपैँया कायम हुनेछ । कम्पनीको अहिलेको सेयरमूल्य प्रतिकित्ता ७ सय १५ रुपैयाँ रहेको छ ।
१० प्रतिशत बोनस बाँडेको कम्पनीको बोनस सहितको ४० प्रतिशत हकप्रद जारी गर्नको लागि गत भदौमा सम्पन्न साधारण सभामै प्रस्ताव पारित भएको थियो । कम्पनीले बिक्री प्रबन्धकमा एनआइसी एशिया क्यापिटललाई छानेको छ ।
चालु आर्थिक वर्षको दोस्रा त्रैमासमा इन्स्योरेन्सले ७ करोड २६ लाख ५७ हजार रुपैयाँ खुद नाफा कमाएर प्रतिसेयर आम्दानी २० रुपैयाँ १३ पैसा कायम गरेको छ । कम्पनीको अहिले ५ अर्ब १६ करोड १४ लाख ६ हजार २ सय ५० रुपैँया बजार पूँजीकरण रहेको छ ।
जीबन बीमा कम्पनीले बीमा समितिको निर्देशन अनुरूप २०७५ असार मसान्तसम्म दुई अर्ब पूँजी कायम गर्नुपर्ने हुन्छ । जसका लागि हकप्रद पश्चात कम्पनीले ९९ करोड थप पूँजी विस्तार गर्नुपर्ने देखिन्छ ।
२०७४ चैत ६ गते प्रकाशित ।
वि.सं.२०७४ चैत ६ मंगलवार ०७:१७ मा प्रकाशित