काठमाडौं । नेपालले क्रिकेटमा एक दिवसीय मान्यता प्राप्त गरेपछि नेपाली दर्शकहरुको ठुलो मागको रुपमा रहेको क्रिकेट रंगशाला निर्माणको लागि आजबाट प्रदेश नम्बर ३ का मुख्यमन्त्री डोरमणी पौडेल र धुर्मुस सुन्तली पाउण्डेसनले औपचारिक रुपमा “फिल्ड भिजिट” शुरु गरेका छन् ।
आज मुख्यमन्त्री पौडेल सहित फाउण्डेसनका सिताराम कट्टेल (धुर्मुस) तथा कुमार कट्टेल (जिग्री) सहितको टोलिले प्रदेश नम्बर ३ अन्तर्गत भक्तपुर जिल्लाको चाँगुनारायण नगरपालिका वडा नम्बर ४ मा रहेको १ सय २५ रोपनी जग्गाको अवलोकन गरेका छन् ।
सो जग्गामा अन्तराष्ट्रिय स्तरको गौतमबुद्ध अन्तराष्ट्रिय क्रिकेट रंगशाला निर्माणको लागि उनीहरुले “फिल्ड भिजिट” गरेका हुन् । “फिल्ड भिजिट” पछि प्रतिक्रिया दिँदै मुख्यमन्त्री पौडेलले प्रदेश सरकारले अन्तराष्ट्रिय स्तरको रंगशाला निर्माणको लागि फाउण्डेसनसँगको सहकार्य गर्दै रंगशाला निर्माणमा सहयोग गर्ने बताए ।
नेपाली क्रिकेट विकासको लागि रंगशाला निर्माण कोशेढुंगो हुने भन्दै उनले प्रदेश नम्बर ३ बाट यसको थालनी हुने बताए । “फिल्ड भिजिट” पछि प्रतिक्रिया दिँदै फाउण्डेसनका सिताराम कट्टेलले सबै नेपाली खेलप्रेमिको लागि रंगशाला निर्माण अत्यावश्यक रहेकोले आफुहरुले पनि यो कार्य गर्न लागेको जानकारी दिए ।
खेल मैदानको अभावमापनि अन्तराष्ट्रिय क्रिकेटमा फड्को मारेको नेपालले अन्तराष्ट्रिय मैदान निर्माण गर्नसके क्रिकेट विकासमा अझ नयाँ आयाम थपिने उनको भनाई रहेको थियो । “फिल्ड भिजिट” मा चाँगुनारायण नगरपालिकाका प्रमुख सोमप्रसाद मिश्रको पनि सहभागिता रहेको थियो ।
२०७४ चैत १७ गते प्रकाशित
वि.सं.२०७४ चैत १७ शनिवार १९:०२ मा प्रकाशित