काठमाडौं । नयाँ ५ सय रुपैयाँको नोटमा एउटा मात्र पाटे बाघ देख्नु भयो भने नक्कली हो कि भनेर नझुक्किनु होला । किनभने राष्ट्र बैंकले बुधबारदेखि प्रचलनमा ल्याएको ५ सयको नयाँ नोटमा अब एउटा मात्र पाटे बाघको चिन्ह रहनेछ । नयाँ ५ सयको नोट साबिककै आकारमा भए पनि पाटेबाघ भने एउटा मात्र रहेको छ । यसअघि ५ सयको नोटमा २ वटा बाघहरुको चित्र थियो ।
नयाँ नोटमा अब अगाडिको बायाँतर्फ सगरमाथा हिमालको चित्र, दायाँतर्फ लालीगुराँसको पानी छाप छ । यस्तै, नोटको तल्लो भागमा गभर्नर डा. चिरञ्जीवी नेपालको दस्तखत हुनेछ । नोटको तल्लो भागको बोर्डरमा नोटको सेरिज नम्बर नेपालीमा बिक्रम सम्बत २०७३ लेखिएको हुनेछ ।
लाली गुराँसको पानी छापको बायाँतर्फ फरक क्षमता भएका (दृष्टिविहीन) हरुले छापेर नोट पहिचान गर्न सक्ने गरी दुईवटा कालो थोप्लाहरु राखिएको राष्ट्र बैंकले जनाएको छ । यस्तै, ५ सय रुपैयाँको नोटको पछाडिपट्टिको माथिल्लो भागमा अंग्रेजीमा नेपाल राष्ट्र बैंक लेखिएको हुनेछ ।
यस्तै ३.५ मिलिमिटर चौडा भएको र रंग परिवर्तन हुने (नोटलाई सीधा हेर्दा रातो रङ र ढल्काएर हेर्दा हरियो रङ देखिने) सुरक्षण धागो रहेको हुनेछ । सगरमाथा हिमालको दायाँ तर्फको तल्लो भागमा रहेको अण्डाकार भित्र रंग परिवर्तन हुने (नोटलाई सीधा हेर्दा सुनौलो रङ र ढल्काएर हेर्दा हरियो रङ देखिने) कुबेरको चित्र रहनेछ ।
नोटको बीच भागमा पाटेबाघको चित्र रहेको छ । नोटको तल्लो भागको बोर्डरमा अंग्रेजीमा रुपिज फाइभ हन्ड्रेड लेखिएको हुनेछ । नोटको तल्लो भागको बोर्डरमा नोटको सेरिज नम्बर अंग्रेजीमा २०१६ एडी लेखिएको हुने राष्ट्र बैंकले जनाएको छ ।
२०७५ बैशाख १२ गते प्रकाशित
वि.सं.२०७५ वैशाख १२ बुधवार १८:३२ मा प्रकाशित
