काठमाडौं । बुटवल पावर कम्पनीको २५ औं वार्षिक साधारण सभा जेठ ८ गते हुने भएको छ । बुटवल पावरले २० प्रतिशत नगद लाभांश दिने प्रस्ताव साधारणसभामा पेश गर्दैछ । हालै बिक्री गरिएको एफपीओपछि कायम हुने पुँजीको २० प्रतिशत नगद लाभांश वितरण गर्न लागिएको हो । एफपीओ भर्ने लगानीकर्ताले पनि लाभांश पाउनेछन् ।
आर्थिक वर्ष २०७३–७४ को वित्तीय विवरण र सञ्चालक समितिको प्रतिवेदनमा छलफल गरी पारित गर्ने एजेन्डा पनि छ । सभा कार्की ब्यांकेट, बबरमहल काठमाडौंमा बिहान १० बजे सुरु हुनेछ । साधारण सभा गर्नका लागि कम्पनीले वैशाख २७ देखि जेठ ८ गतेसम्म बुक क्लोज गर्ने भएको छ । वैशाख २६ गतेसम्म कायम सेयरधनीले मात्र नगद लाभांश सुरक्षित गर्न सुक्नेछन् ।
बुटवल पावरले माघ १५ गतेदेखि १९ गतेसम्म २ अर्ब ४ करोड ४५ लाख ८१ हजार रुपैयाँ बराबरको ४० लाख ८१ हजार कित्ता एफपीओ निष्कासन गरेको थियो । त्यसअघि बुटवल पावरले ३ चिनियाँ कम्पनीसँगको संयुक्त लगानीमा ‘एससीआइजी इन्टरनेसनल नेपाल हाइड्रो जोइन्ट डेभलपमेन्ट कम्पनी’ स्थापना गरेको थियो । नेपालमा जलविद्युत विकास गर्ने उद्देश्यले १ अर्ब ९० करोड रुपैयाँ पुँजीको यो कम्पनी स्थापना भएको बुटवल पावरले जनाएको छ ।
२०७५ बैशाख १३ गते प्रकाशित
वि.सं.२०७५ वैशाख १३ बिहीवार १०:४३ मा प्रकाशित