काठमाडौं । मेगा बैंक र टुरिजम डेभलपमेन्ट बैंकको वैशाख ३० गतेदेखि एकीकृत कारोबार सुरु हुने भएको छ । २ बैंक एक आपसमा मर्ज हुन लागेका हुन् । मर्जपछि मेगा बैंकको नामबाट एकीकृत कारोबार हुनेछ । नेपाल राष्ट्र बैंकले वैशाख ९ गते र कम्पनी रजिष्ट्रारको कार्यालयले वैशाख १२ गते एकीकृत कारोबार गर्न दुवै बैंकलाई अन्तिम स्वीकृति दिइसकेका छन् ।
मर्जपछि टुरिजम डेभलपमेन्ट बैंकको सम्पूर्ण सम्पत्ति र दायित्व अब मेगा बैंकले सकार्नेछ । यसअघि सम्पन्न दुवै बैंकको साधारण सभाले टुरिजम डेभलपमेन्ट बैंकको प्रतिसेयर १०० सेयर बराबर मेगाको ९५ कित्ता कायम हुने गरी सेयर स्वाप अनुपात कायम गरिसकेको छ । अब टुरिजमको १ कित्ता सेयर हुनेले मेगाको ०.९५ कित्ता सेयर पाउनेछन् ।
एकीकृत कारोबार लागि बैशाख २८ गते दुबै बैंकले प्रदान गर्ने अतिरिक्त बैंकिङ सेवा तथा २९ गते प्रदान गरिने सार्वजनिक बिदाको काउन्टर सेवा बन्द हुने जनाएका छन् । त्यस्तै टुरिजम्को २८ गतेको नियमित कारोबार पश्चात ३० गतेसम्म एटिएम सेवा पनि बन्द हुने भएको छ ।
टुरिजम बैंकका ग्राहकले आफूसँग रहेको चेक तथा एटिएम कार्ड मेगा बैंकको नाममा प्रतिस्थापन गर्न सक्नेछन् । तर, प्रतिस्थापन नगरेसम्म भने साविकको चेक स्वीकार गरिने मेगा बैंकले जनाएको छ ।
२०७५ बैशाख २१ गते प्रकाशित
वि.सं.२०७५ वैशाख २१ शुक्रवार १३:१० मा प्रकाशित