काठमाडौं । कुमारी बैंकले शुक्रबार देखि १ करोड १९ लाख ३८ हजार ९९१.६५ कित्ता (२० प्रतिशत) हकप्रद सेयर बिक्री खुला गरेको छ । आवेदन दिने अन्तिम म्याद जेठ ३१ गतेसम्म हुनेछ । वैशाख ९ गतेसम्म कायम सेयरधनीले मात्र यो हकप्रद भर्न सक्नेछन् ।
हाल कुमारीको चुक्ता पुँजी ५ अर्ब ९६ करोड ९४ लाख ९६ हजार रुपैयाँ छ । २० प्रतिशत हकप्रद बिक्रीपछि चुक्ता पुँजी ७ अर्ब १६ करोड ३३ लाख ९५ हजार १६५ रुपैयाँ पुग्नेछ । ८ अर्ब रुपैयाँ चुक्ता पुँजी पुर्याउन बाँकी रकम बोनस सेयरको सहारा लिन सक्नेछ ।
लगानीकर्ताले बिक्री प्रबन्धक एनआइबीएल एस क्यापिटल लाजिम्पाट र यसका शाखा कार्यालय लालदरबार काठमाडौं, लगनखेल ललितपुर, चिप्लेढुंगा पोखरा, ट्राफिकचोक बुटवल, आदर्शनगर वीरगञ्ज र गोल्छाचोक विराटनगर शाखाबाट पनि हकप्रद भर्न सक्नेछन् ।
यसैगरी, कुमारी बैंकको प्रधान कार्यालय दरबारमार्ग काठमाडौं सहित सम्पूर्ण शाखा कार्यालय र धितोपत्र बोर्डबाट स्वीकृत प्राप्त आस्वा सेवामा सहभागी बैंक तथा वित्तीय संस्थाबाट पनि सेयर भर्न पाइनेछ । राष्ट्र बैैंकले तोकेको ८ अर्ब रुपैयाँ चुक्ता पुँजी पुर्याउने क्रममा कुमारीले हकप्रदको बाटो रोजेको हो । गत वर्ष पनि कुमारीले ५० प्रतिशत हकप्रद सेयर बिक्री गरेको थियो ।
चालु आर्थिक वर्षको तेस्रो त्रैमासमा कुमारी बैंकले ७० करोड ५६ लाख ७६ हजार रुपैयाँ खुद नाफा कमाएको छ । प्रतिसेयर आम्दानी १५ रुपैयाँ ७६ पैसा रहेको यस बैंकको प्रतिसेयर नेटवर्थ १४७ रुपैयाँ ११ पैसा छ ।
२०७५ बैशाख २८ गते प्रकाशित
वि.सं.२०७५ वैशाख २८ शुक्रवार ११:०५ मा प्रकाशित