काठमाडौं । प्रधानमन्त्री ओलीले वर्तमान सरकारले जनताको भरोसालाई तल माथी पर्न नदिने बताउनुभएको छ । नेपाल राष्ट्रिय शिक्षक संगठनको १२ औं महाधिवेशनको आज उद्ध्घाटन गर्दै प्रधानमन्त्री ओलीले सो कुरा बताउनुभएको हो । “जनताको लागि यो सरकार अन्तिम आशा हो । जनताको यो आशालाई तलमाथी पर्न दिइदैन” प्रधानमन्त्री ओलीले भन्नुभयो “हामी भ्रष्ट भए सदाचार कहाँ पाइएला ? त्यसकारण सदाचार भएर देश बनाउन सबै लाग्नु पर्दछ ।”
प्रधानमन्त्री ओलीले बालबालिकालाई असफल गराएर सरकार र शिक्षा प्रणालीले अपराध गरिरहेको बताउनुभएको छ । प्रधानमन्त्री ओलीले हरेक बालबालिकामा फरक फरक खालका क्षमता हुने तर शिक्षाले सैद्धान्तिक ज्ञानलाई मात्र मान्यता दिने नाममा बच्चालाई असफल गराएर ठुलो अन्याय गरेको बताउनुभयो । “असाधरण क्षमता भएका साना नानीहरुलाई हामी फेल बनाएर उनीहरुको हृदयमा बन्चरो हानिरहेका छौं” प्रधानमन्त्री ओलीले भन्नुभयो “ति बच्चाहरु फेल होइन सरकार,शिक्षक,विद्यालय ,पाठ्यक्रम र शिक्षा प्रणाली फेल हो ।” बच्चाहरुको क्षमता पहिचान गरेर रुचीको विधामा उनीहरुलाई सिक्ने अवसर प्रदान गर्नुपर्ने प्रधानमन्त्री ओलीको भनाइ छ ।
प्रधानमन्त्री ओलीले सरकारी विद्यालयको नतिजा सन्तोषजनक नरहेको बताउनुभयो । शिक्षकहरुलाई नतिजा सुधार्नका लागि कक्षा कोठामा प्रविधिको प्रयोग र शिक्षकहरुलाई अध्ययन गर्ने बानी बसाउन आग्रह गर्नुभएको छ । अस्थायी शिक्षकका समस्या समाधान गर्न पनि सरकार गम्भिर भएकोे प्रधानमन्त्री ओलीको भनाइ छ ।
“पढाउन नजान्ने शिक्षक राखेर हुदैन” प्रधानमन्त्री ओलीले भन्नुभयो “सबै शिक्षकहरुले आफूले पढाउने बिषयमा दक्षता हासिल गर्नुहेस । बिषयवश्तुको ज्ञान शिक्षकलाई नै छैन भने कसरी पढाउनुहुन्छ ?”
प्रधानमन्त्री ओलीले शैक्षिक प्रमाणपत्र लिएर केही पनि नजान्ने र रोजगार पनि नपाउने अवश्थाको अन्त्य हुनुपर्ने बताउनुभएको छ । “शिक्षालाई आधुनिक,प्रतिष्पर्धी,विकास र रोजगारसँग जोडिएको बनाउनु पर्दछ ” प्रधानमन्त्री ओलीले भन्नुभयो ।
२०७५ जेठ १६ गते प्रकाशित
वि.सं.२०७५ जेठ १६ बुधवार १९:२८ मा प्रकाशित
